Тобокалова: гепатитти вакцинация жолу менен гана алдын алса болот
© Sputnik / Асель Сыдыкова
Жазылуу
Медицина илимдеринин доктору, профессор, гепатолог Сапарбү Тобокалова жеке клиникаларды, сулуулук салондоруна бизнес катары мамиле жасабай дайыма текшерип туруу зарыл экенин айтты.
Кыргызстанда гепатитке каршы эмдөө 2000-жылдары башталган. Гепатиттин В түрүнө каршы эмдөө улуттук календарга киргизилген. Ал эми гепатиттин А түрүнө каршы аралыгы бир жыл сегиз айдан эки жолу эмдөө алуу зарыл. Бул адамды сарыктан өмүр бою сактай турганын Сапарбү Тобокалова Sputnik Кыргызстан радиосунун эфиринде маек куруп жатып билдирди.
Тобокалова: гепатитти вакцинация жолу менен гана алдын алса болот
Анын айтымында, гепатитти вакцинация жолу менен гана алдын алса болот.
"Гепатитти эки топко бөлөбүз. Биринчи топко кир суу, кир колдордон жуккан А, Е түрлөрү кирет. Гепатит Е 30 жыл мурун көп кездешип, кош бойлуу аялдардын өмүрүн алып келген болсо, азыр бирин-серин гана учурлар бар. Ал эми гепатиттин А түрү менен өлкөдө балдар көп жабыркайт. Буга чейин Фергана өрөөнүндөгү аймактарда изилдөө жүргүзүлүп, үч жашка чейинки балдардын 80 пайызы аталган илдет менен ооруп айыкканы белгилүү болгон. Бул дарттан айыккан адамдарда гепатиттин антителосу өмүр бою сакталат. Азыркы күндө жылына А түрү менен ооруган 12-13 миӊ адам катталат. Статистика ар бир 3-4 жылда кескин көбөйүп турат. Бул ооруларды вакцинация жолу менен гана алдын алсак болот. Өнүккөн өлкөлөрдө, алсак, 146 миллион калкы бар (анын жарымынан азыраагы балдар) Россияда жылына гепатит менен ооруган 400-500 бала гана катталат. Анткени ал жакта вакцинация жолго коюлган. Кийинки B, C, D түрлөрү кан, жыныстык катнаш, энеден балага өтөт. Муну тиш дарылатканда, маникюр жасатып, ийне сайдырганда жуктуруп алуу коркунучу бар. Андыктан жеке клиникаларды, сулуулук салондорун бизнес катары мамиле жасабай дайыма текшерип туруу зарыл", — деди Тобокалова.
Ал вирустук гепатит өтүшүп кеткенде боордун циррозу же рагына айланарын эскертип, вакцина алуу керектигин кошумчалады.
