Ибраева: жугуштуу эмес оорулардын алдын алуунун II фазасы башталды
Жазылуу
Медициналык жардам жана дары-дармек саясатын уюштуруу башкармалыгынын башкы адиси Нургүл Ибраева Швейцария жугуштуу эмес оорулар менен күрөшүүгө беш миллион доллардан ашык каражат бергенин айтты.
Ош шаарында Швейцариянын "Кыргызстанда жугуштуу эмес ооруларды эффективдүү башкаруу жана алдын алуу" долбоорунун II фазасынын расмий ачылышы болуп өттү. Долбоордун мурунку этабы саламаттык сактоо системасында бейтапка жолдомо берүү процессин тартипке келтирүүгө, үй-бүлөлүк медайымдардын ролун күчөтүүгө, бюджеттин ачык болуусуна, электрондук саламаттык сактоо системасын жакшыртууга жана медициналык кызматтын сапатын жогорулатууга жардам берди. Бул тууралуу Нургүл Ибраева Sputnik Кыргызстан радиосунун эфиринде маек куруп жатып билдирди.
Ибраева: жугуштуу эмес оорулардын алдын алуунун II фазасы башталды
Анын айтымында, долбоордун экинчи фазасына Швейцария беш миллиондон ашык швейцариялык франк бөлгөн.
"2018-жылдан бери долбоор Чүй, Нарын, Талас жана Ысык-Көл облустарын камтыды. Эми ал Ош, Жалал-Абад жана Баткен облустарында, ошондой эле Ош жана Бишкек шаарларында ишке ашырылат. Швейцариялык долбоор баштапкы медициналык-санитардык жардам кызматкерлеринин тобокел тобундагы же жугуштуу эмес оорулар менен жашаган калкка натыйжалуу, адилеттүү, сапаттуу жардам көрсөтүүсүнө көмөк берет. Долбоор ошондой эле калк арасында сергек жашоо образын жайылтуу максатында жугуштуу эмес оорулар боюнча калкка маалымат берүүгө багытталган. Кыргызстанда жугуштуу эмес оорулар калктын майып болушунун жана эрте өлүмүнүн негизги себеби болуп саналат. Ошондуктан бул долбоорду ишке ашыруунун мааниси зор. Долбоор системалык деңгээлде иштеп жана түндүк аймактардагы үй-бүлөлүк дарыгерлер борборлорун компьютердик жабдуу менен камсыз кылуу аркылуу алардын материалдык-техникалык базасын чыңдайт. Бул саламаттык сактоо тармагын санариптештирүүгө абдан чоң салым болуп саналат. Ошондой эле долбоордун аркасында жергиликтүү өз алдынча башкаруу органдары калктын ден соолугун чыңдоого көбүрөөк көңүл бурууга үйрөнүшкөнүн белгилей кетсек болот. Ушундай эле жыйынтыктар Ош, Жалал-Абад, Баткен облустарында, Ош жана Бишкек шаарларында күтүлүүдө", — деди Ибраева.
Ал жугуштуу эмес оорулардын баш сабында турган жүрөк-кан тамыр оорулары, рак, өпкө оорулары жана диабет калктын өлүмүнүн негизги себеби экенин кошумчалады.
