Жети депутат фейктер жөнүндө мыйзамды өзгөртүүнү сунуштады. Эмне камтылган?
© Фото / пресс-служба Жогорку Кенеша
Жазылуу
Долбоордо интернет-сайттын жана социалдык баракчанын ээлеринин укуктарын коргоого басым жасалган.
БИШКЕК, 14-окт. — Sputnik. Фейк маалыматтарга даттануу тартибин жөнгө салган "Анык эмес (жалган) маалыматтан коргоо жөнүндө" мыйзам долбоорун өзгөртүү сунушталды.
Демилгечилер Жогорку Кеңештин депутаттары: Жанар Акаев, Адахан Мадумаров, Элмурза Сатыбалдиев, Гуля Кожокулова, Дастан Бекешев, Сеид Атамбаев, Чыңгыз Айдарбеков.
Авторлор учурдагы мыйзамда бардык укуктар арыз ээсине берилип калганын айтууда. Мында маалыматты жарыялаган адам же уюм анын иш-аракетине болгон даттанууну кароого эч бир катышпай, өз укуктарын коргой албай калары белгиленген.
"Маалыматты жарыялаган жак кызматтын чечимдерин аткарууга же ага сот тартибинде даттанууга милдеттүү. Мындайда бүтүндөй сайтты бөгөттөө ыйгарым укуктуу мамлекеттик орган чечим чыгарары менен жүргүзүлөт. Андан тышкары, мамлекеттик органдын мыйзамсыз чечими үчүн эч кандай жоопкерчилик жок. Ушуга байланыштуу сайтты жоюу тууралуу чечимге даттануунун тартиби, мөөнөттөрү, арыз ээсинин жана сайттын жетекчилигинин укуктары, чечимге даттануу мүмкүнчүлүгү сыяктуу негизги принциптер мыйзамда белгиленүүгө тийиш", — деп жазылат маалыматтык негиздемеде.
Демилгечилер "Интернет тармагындагы сайттын же баракчанын ээсинин аракеттерине даттануунун тартиби" деген өзүнчө берене иштеп чыккан. Ал төмөндөгүдөй:
Анык эмес маалымат таратылса жабыр тарткан тарап интернет сайттын же социалдык баракчанын ээсине ал маалыматты өчүрүү же төгүндөө тууралуу арыз менен кайрылууга укуктуу;
Маалыматты алып салуу жөнүндө арыз жалган экенин негиздеген фактыларды камтууга тийиш;
Интернет-сайттын же социалдык баракчанын ээси арызды үч күндүн ичинде карап чыгууга милдеттүү (учурда 24 сааттын ичинде);
Анык эмес маалыматты өчүрүү жана төгүндөөдөн баш тарткан учурда жабырлануучу министрлер кабинети аныктаган ыйгарым укуктуу мамлекеттик органга жазуу же электрондук түрдө арыз менен кайрылат;
Ыйгарым укуктуу мамлекеттик орган анык эмес маалыматты өчүрүүдөн мурун милдеттүү түрдө арыз ээсин жана сайттын же баракчанын ээлерин чакырышы керек. Анын чечими административдик иштер жана административдик жол-жоболор жөнүндө мыйзамдарга ылайык даттанылышы мүмкүн же сот тартибинде каралат;
Сотко даттанылган учурда мамлекеттик органдын чечимин аткаруу токтотулат;
Анык эмес маалыматты өчүрүү тууралуу арызды кароонун тартиби жана арызга тиркелүүсү зарыл болгон документтердин тизмеги министрлер кабинети тарабынан аныкталат.
13 Тогуздун айы 2022, 12:39
