Койчукеев: шайлоо мыйзамына өзгөртүү киргизүү үчүн жумушчу топ иштөөдө
© Sputnik / Асель Сыдыкова
Жазылуу
Борбордук шайлоо комиссиясынын төрайымынын орун басары Нурлан Койчукеев шайлоо демократиянын өзөгү экенин белгиледи.
Шайлоо мыйзамдарына өзгөртүү киргизүү үчүн жумушчу топ түзүлүп, иштеп жатат. Бул тууралуу Нурлан Койчукеев Sputnik Кыргызстан радиосуна маек куруп жатып билдирди.
Койчукеев: шайлоо мыйзамына өзгөртүү киргизүү үчүн жумушчу топ иштөөдө
Анын айтымында, жумушчу топко депутаттар, коомдун өкүлдөрү жана мамлекеттик кызматкерлер кирди.
"Эл бийлигин ишке ашыруунун мыйзамдуу жолу — шайлоо. Анын кемчиликсиз иштеп турушунан көп нерсе көз каранды. Анткени өлкөдө бардык нааразычылыктар акыйкатсыз шайлоодон улам келип чыгууда. Учурда негизинен шайлоо процесстери жыйынтыкталды. Кийинкилерине чейин шайлоо мыйзамдарын анализдеп, кемчилик, мүчүлүштүктөрүн оңдоп чыгуу пландалууда. Ал үчүн депутаттардан, коомчулуктан жана башка кызыккандардан атайын жумушчу топ түзүлгөн. Негизги максаты — талапкерлерге жана шайлоочуларга ыңгайлуу шарт түзүү. Топтун алгачкы отурумдары өтүп, жети багытта иш алып баруу үчүн чакан топтор түзүлдү. Алар жергиликтүү, президенттик жана Жогорку Кеңешке шайлоолор, каржылоо, мигранттарга жана мүмкүнчүлүгү чектелгендерге шайлоого катышуу мүмкүндүгүн түзүү, шайлоо мыйзамдарын бузууну азайтуу, электрондук системаларды колдонуу жана үгүт иштерин эффективдүү жүргүзүү боюнча сунуштарды даярдайт. Бул багыттардын ыңгайлуу жактары жана тобокелчиликтери талданып, мыйзамга тийиштүү өзгөртүүлөр сунушталат", — деди Койчукеев.
Ошондой эле ал жалпы шайлоо системасында кескин өзгөрүүлөр болбой турганын кошумчалады.
