Тодогелдиев: учурда өлкөдө 77 фостердик үй-бүлө бар
09:54 23.09.2022 (Жаңыртылды: 10:15 23.09.2022)
© Sputnik / Асель Сыдыкова
Жазылуу
Эмгек, социалдык колдоо жана миграция министрлигинин Үй-бүлөгө жана балдарга кызматтарды өнүктүрүү башкармалыгынын башчысы Бакыт Тодогелдиев республикадагы фостердик үй-бүлө тууралуу айтты.
Жалпысынан учурда 77 фостердик үй-бүлөдө 158 бала тарбияланууда. Республиканын Ысык-Көл, Чүй облустары бул тармакта активдүүлүгүн көрсөтүп келет. Ал эми Талас, Нарын жана Баткен аймактарында фостердик үй-бүлө жокко эсе. Бул тууралуу Бакыт Тодогелдиев Sputnik Кыргызстан радиосуна маек куруп жатып билдирди.
Тодогелдиев: учурда өлкөдө 77 фостердик үй-бүлө бар
Анын айтымында, фостердик үй-бүлөгө коюлган негизги талаптардын бири — баланы социалдаштыруу, кадимки үй-бүлөлүк тарбия менен камсыздоо.
"Фостердик үй-бүлө өлкө аймагында 2014-жылдан тарта иштеп келет. Ага катышууну каалаган ата-энелер атайын окуудан өтүшөт. Фостердик үй-бүлө десе эле көпчүлүк атайын окуудан өткөн соң даяр баланы алып келип берет, анан ал баланы биротоло өзүнүкү кылып багып алат деп түшүнөт экен. Эреже мындай эмес. Фостердик үй-бүлө бөбөктөргө балдар үйлөрүн гана алмаштырат. Башкача айтканда, атайын окуудан өтүп, даярдыгы тууралуу күбөлүккө ээ болгон ата-энеге бала балким бир күнгө эле жайгаштырылышы мүмкүн, болбосо 18ге чыкканча ошол үйдөн тарбия көрүшү ыктымал. Ар кандай абал жаралат. Анан балдар жаш курагына, ошол үйдөгү өз балдарынын жаш курагына да карап бөлүштүрүлөт. Бир үйдө өз балдарын кошкондо бештен ашык бала болсо, баланы жайгаштырууга мыйзам жол бербейт. Ошол эле учурда социалдык кызматкерлер белгилүү убакытта келип балага кандай мамиле жасалып жатканын көзөмөлдөп турушат. Ата-эне өз баласын унутуп фостердик балага көңүл буруп же тескерисинче тарбия үлгүсүн көрсөтпөшү керек. Эгер ал бала мектептен же башка жерден уруша кетип, таяк жеп жана башка учурлар болсо тиешелүү кызматтарга билдирип турушу шарт. Айрым учурда бала көнбөй койсо, ал үчүн үй-бүлө алмаштырылат. Ушундай жагдайларды айтып бергенибизде айрым ата-энелер баш тартып кеткен учурлар да бар. Фостердик үй-бүлөнүн башкы максаты ошол балага болушунча үй-бүлөлүк шарт түзүү, аны кадимки үй жумуштарына аралаштыруу болуп эсептелет. Айрым шарттарда ата-эне менен бала эмоционалдык жактан бири-бирине катуу байланып калып, кийин ал баланы туугандары же башка бирөөлөр алып кетип жатканда коштошо албай кыйналат. Бул бала үчүн да абдан оор. Андыктан биз фостердик үй-бүлө боло турган ата-энеге булардын баарын түшүндүрүп, окутууларды жүргүзөбүз", — деди Тодогелдиев.
Ал фостердик үй-бүлө болгон ата-энеге ай сайын 14 миң сомдон айлык жана ар бир карамагына алган бала үчүн чыгымдарына 11 миң сомдон төлөнөрүн кошумчалады.
