Алмазова: COVID-19ду жөтөл аркылуу аныктоочу технология презентацияланды
© Sputnik / Асель Сыдыкова
Жазылуу
ӨКМдин медицина бөлүмүнүн улук офицери Жаңыл Мырза Алмазова Россиянын илимпоздор тобу COVID-19 менен ооруган бейтаптарды жөтөлүү жолу менен аныктай ала турган Acoustery технологиясын иштеп чыкканын айтты.
Россиялык кесиптештердин технологиясы алардын кайрылуусу менен ӨКМдин Борбордук аппаратында коронавирус инфекциясын (COVID-19) жана башка дем алуу органдарынын курч респиратордук ооруларын жөтөл аркылуу аныктай алган дифференциалдык диагностикалоо Acoustery системасынын презентациясы болуп өттү. Аны долбоордун жетекчиси, С. А. Лебедев атындагы Россия Илимдер академиясынын Физика институтунун илимий кызыматкери Дмитрий Михайлов өзү тааныштырды. Бул тууралуу Жаңыл Мырза Алмазова Sputnik Кыргызстан радиосунун эфиринде маек куруп жатып билдирди.
Алмазова: COVID-19ду жөтөл аркылуу аныктоочу технология презентацияланды
Анын айтымында, азырынча Acoustery системасынын диагнозунун тактыгы болжол менен 85 пайызды түзөт, бирок аны жакшыртуу пландалып жатат.
"Системанын иштөө принциби үндү визуалдык көрсөткөн спектрограммага негизделген. Дарыгерлер ар кандай оорулар менен жабыркаган адамдарда пайда болгон жөтөлдүн айырмачылыктары бар экенин жакшы билишет. Сүрөт түрүндө чагылдырылган жөтөлдүн ар бир түрү уникалдуу үлгүгө ээ. Атап айтканда, COVID-19дагы жөтөлдүн спектрограммасынын өзүнүн уникалдуу өзгөчөлүгү бар. Жарым жыл бою Россиянын, Беларустун жана Казакстандын ар кандай клиникаларынын жана медициналык университеттеринин дарыгерлери COVID-19 менен ооруган адамдардан жөтөлдүн миңдеген үн үлгүлөрүн чогултушкан. Ал эми системаны иштеп чыгуучулар нейрон түйүндөрү аркылуу спектрограммаларды талдап жана жөтөлдүн "ковид" түрүн аныктоо мүмкүнчүлүгүн ачышты. Убакыттын өтүшү менен мындай алдын ала диагностика системасы жакшыртылып, нейрон түйүндөрү астма, көк жөтөл жана башка өпкө ооруларын да таанууга үйрөтүлөт. Системаны кадимки уюлдук телефонго тиркеме түрүндө жүктөп алып да колдонсо болот. Учурда аталган системаны жалпы коомчулукка жеткиликтүү кылып иштеп чыгуу боюнча иш жүрүүдө. Азыр иштеп чыгуучулар Росздравнадзордун корутундусун күтүп жатышат. Менин маалыматым боюнча, Россиядагы бир аэропортто Acoustery технологиясы коюлуп сыналууда", — деди Алмазова.
Ал мындай системаны аэропорттордо, автобустарда, поезддерде, автобекеттерде, дүкөндөрдө, оорукана жана дарыканаларда, дегеле эл көп чогулган жерлерде орнотууга болорун, жыйынтык ПЦР-анализден айырмаланып ошол замат даяр болорун кошумчалады.
