Бөтөнөев: өлкөнүн Улуу Жеңишке кошкон салымы так аныктала элек
Жазылуу
Ош мамлекеттик университетинин чыгыш таануу жана тарых факультетинин чыгыш таануу кафедрасынын башчысы, тарых илимдеринин кандидаты, доцент Жолдошбек Бөтөнөев өлкөдө Улуу Ата Мекендик согушка саясий көз караш менен мамиле жасаларын белгиледи.
Кыргызстандын Улуу Ата Мекендик согуштагы жеңишке кошкон үлүшү так аныктала элек. Мындай пикирин Жолдошбек Бөтөнөев Sputnik Кыргызстан радиосуна маек куруп жатып билдирди.
Бөтөнөев: өлкөнүн Улуу Жеңишке кошкон салымы так аныктала элек
Анын айтымында, Улуу Ата Мекендик согуш тууралуу Абылбек Асанканов менен Өскөн Осмоновдун китеби боюнча гана окутулат.
"Улуу Ата Мекендик согуш жаштарды мекенчилдикке үндөө менен чектелип калган. Маселен, Кыргызстан 300 миңден ашык аскерин, айыл чарба продукциясын, өлкөдөгө өндүрүмдү, тапкан-ташыганын согушка жөнөткөн. Бирок алардын эсебин тактап, изилдөө иштери толук кандуу жүргүзүлгөн эмес. Ал тургай райондук аскер комиссариаттарынын архивдери изилдене элек. Коңшу Казакстанда согуш туткундары боюнча чоң китеп жазылды. Ошонун ичинен кыргыз жоокерлери тууралуу маалыматтар кездешүүдө. Эмне үчүн тарыхчылар, тарых факультеттери ушундай изилдөө иштерин жүргүзбөй келет? Согуш туткундары, тылда эмгектенгендер, өлкөнүн согушту жеңүүгө экономикалык салымы боюнча иликтөөлөр жүргүзүлбөй, комплекстүү иштер жок. Мындан тышкары, согуштун ардагерлери учурда азайып калды. Ошолордун айткандарын видео, аудиого жаздырып, буюмдарын музей үчүн сактоо керек. Анткени алар ошол тарыхтын катышуучулары, күбөлөрү", — деди Бөтөнөев.
Ошондой эле ал Улуу Ата Мекендик согуш боюнча изилдөөгө өкмөт тарабынан да көңүл бөлүнбөй жатканын кошумчалады.
