Тукумсуздук, рак, инсульт... Адис насвайдын кесепетин эскертти
Жазылуу
Саламаттык сактоо министрлигинин алдындагы Республикалык саламаттык сактоо борборунун чылымга каршы күрөшүү бөлүмүнүн башчысы Чынара Бекбасарова насвайдын ден соолукка тийгизген кесепети тууралуу айтып берди.
Насвайга тамеки, жыгач отундун күлү, акиташ, жабыштыруу үчүн желим (клей) кошулат экен. Анын курамындагы акиташ ооздун былжыр чел кабыгын күйгүзүп, жара кылат. Көптөн бери насвай тарткан адамдын кекиртегинде же ооз көңдөйүндө рак оорусунун жаралышы толук мүмкүн. Ал ооздогу даам сездирүүчү рецепторлордун сезгичтигин жоготот. Ооздогу шилекей бези сезгенип чоңойгондуктан, шилекей көп бөлүнүп чыга баштайт да адам түкүрүнө берет. Бул тууралуу Чынара Бекбасарова Sputnik Кыргызстан радиосунда маек куруп жатып билдирди.
Тукумсуздук, рак, инсульт... Адис насвайдын кесепетин эскертти
Анын айтымында, насвай тукумсуздукка алып келип, рак ооруларын чакырат.
"Айрым адамдар тамекиге караганда насвайдын зыяны аз деп жаңылыш ойлошот. Биринчиден, тамеки фабрикаларда санитардык жактан таза жерде жасалса, бул колдо жасалат. Антисанитардык жерде жасалгандарына ооруну жаратуучу түрдүү микробдор кошулуп кетет. Анан да жасаган киши сарык же кургак учук сыяктуу оорулар менен ооруса, насвай аркылуу ал оорулардын жугуу коркунучу чоң. Насвай жеңил баңгизат түрүнө киргендиктен, аны чеккенде адамдын нерви эс алып, күнүмдүк маселе унутула түшөт. Ошондой эле анын көз карандылыкты пайда кыларын эч качан унутпашыбыз керек. Насвай тартканда кан басым жогорулап, жүрөк бат-баттан согот. Бул билинбей жүрүп отуруп жүрөк ооруларын (анын ичинде миокард инфаркты, инсульт) жаратат. Насвай чеккенде кан тамырлар ичкерет да, мээге кычкылтек жетишпей, иштөөсү бузулат. Акырындап унутчаактык келип чыгат. Ойлонуу, кабыл алуу, эске тутуу жөндөмдүүлүгү төмөндөйт. Учурда биздин адистер насвай жасаган аймактарды кыдырып, жасалышы менен таанышты. Ошол адамдар менен сүйлөшкөндө алардын 85 пайызы министрлер кабинети колдоп, жаңы мүмкүнчүлүктөрдү түзүп, жардам бере турган болсо, ал ишин таштап башка жумушка иштөөгө даяр экенин билдирген", — деди Бекбасарова.
Адис насвайды чегип шилекейди жутканда ашказан, ичегилер сезгенип, бара-бара гастрит, ашказан-ичеги жаралары пайда болорун кошумчалады.
