Канча бай, бий өткөн... Кадырбеков Ташиев менен Мадумаровду ынтымакка чакырды

© Фото / пресс-служба Жогорку КенешаЖогорку Кеңештин депутаты Нуржигит Кадырбеков
Жогорку Кеңештин депутаты Нуржигит Кадырбеков - Sputnik Кыргызстан, 1920, 09.06.2022
Жазылуу
Эл өкүлү Кыргызстанга батынып тап бергендер көбөйгөнүн айтты. Себеби "тилибиз, башыбыз бирикпей, сүрүбүз, сырыбыз кетип жатат" деп эсептейт.
БИШКЕК, 9-июн. — Sputnik. Жогорку Кеңештин депутаты Нуржигит Кадырбеков өткөн жумада жаакташа кеткен саясатчыларды ынтымакка чакырды.
Эл өкүлү бул саясатчынын, тиги партиянын тарапташы деп ортодо бөлүнүү пайда болгонуна тынчсызданып жатканын билдирди.
"Өткөндө бул жакта болбой турган нерсе болуп кетти, абдан ысык күн болду. Эл мурда көпүрө, жол курууну сурайт эле, азыр ынтымакты, саясий маданиятты көрсөтүүнү өтүнүүдө. Эртеси кыргыздын бука моюн, буура сан жигиттери чыгып алып бир саясатчыбызды колдоп, экинчисине тил тийгизип жатат. Анан тигинин тарапкерлери чыкса ортодо ынтымак ыдырап кетет. Ушул күчтү колдон келсе башкаларга көрсөтөлү", — деди Кадырбеков.
Депутат ошол окуядан кийин кыргыз-тажик чек арасында чыр чыкканын эске салып, Кыргызстанга тап бергендер көбөйгөнүн айтты. Себеби "тилибиз, башыбыз бирикпей, сүрүбүз, сырыбыз кетип жатат" деп эсептейт депутат.
"Ал жигиттерге кайрылат элем, ошол күчтү, духту тышка көрсөтөлү. Тарыхта күчтүү мамлекетти ичтен иритип жеңишкен. Азыр геосаясий жагдайды, чек арадагы абалды көрүп жатасыздар, бизге болуп көрбөгөндөй ынтымак керек. Өкмөт менен парламент элдин маанайына кадимкидей таасир этип, кыжалат кылып коёт экен", — деди эл өкүлү.
Ошондой эле ал бийлик, байлык, машина, алтын-күмүш менен эч ким ызаат, аброй таба албай турганын белгиледи.
"Жараткан ызаатты ниетиңе, пийилиңе жараша берет. Бизге чейин канча бай, бий өттү... Бул жерде канча депутат отурду, канча министр, өкмөт башчы, президент келди. "Сизден", "сенге" өтө элек болчубуз, ушунчалыкка түшүп кеттикпи? "Эгер ынтымак болбосо, башыңдан алтын так кетет" деп айтышат. "Кемигинде да, керкисинде дагы бар" деген сөз бекеринен эмес. Эл шоу-бизнес жылдыздарын көп көрөт деп ойлочумун, азыр эң көп көргөнү ушул жердеги биздин талкуубуз экен", — деди Кадырбеков.
Соңунда ал саясатчыларды текеберленбей, сен жакшы, мен жаман, сен буудай, мен саман деген принцип менен иштей берсе өнүгүү болорун айтты.
Белгилей кетсек, өткөн жумада парламенттин жыйынында УКМК төрагасы Камчыбек Ташиев менен депутат Адахан Мадумаров жаакташа кеткен. Ташиевдин "колуңду кезебей сүйлө, сындырып коём" деп, керек болсо Мадумаровду камап салуудан кайра тартпастыгын айткан. Депутат "колуңдан келбейт, мен сага окшоп Ак үйдүн дарбазасынан секирген эмесмин" деп жооп кайтарган.
Жогорку Кеңештин төрагасы Талант Мамытов - Sputnik Кыргызстан, 1920, 09.06.2022
Өлбөй тирүү калбайсың! Төрага Мамытов депутаттарды ыр менен ынтымакка чакырды
Жаңылыктар түрмөгү
0