Бекбасарова: аялдар арасында насвай колдонгондордун саны 7 эсеге өстү

"2021-жылдын 15-сентябрында президент Садыр Жапаров тамеки жана аэрозолдун зыяндуу кесепеттеринен коргоо жөнүндө мыйзамга кол койгон. Себеби азыр тамекинин жалбырагынан эмес, синтетикалык түрдө жасалган никотин (никпэк) пайда болду. Буга чейин 2006-жылдагы КРдин жарандарынын ден соолугун тамекинин жана аны керектөөнүн зыяндуу таасиринен коргоо жөнүндө мыйзам жакшы иштеп келген. Кийин өндүрүшчүлөр электрондук чылым, ысытылган тамеки (IQOS), вейп өңдүү жаңы тамеки жана никотин заттарын ойлоп чыгарышты. Демек, буларды да көзөмөлгө алыш керек болду. Анын үстүнө эски мыйзамда насвайды колдонуу боюнча да шарттар айтылган эмес. 2005-жылы 15 жаштан жогору 6 000 адамдын арасында тамеки колдонуу боюнча изилдөө өткөрүлгөн. Андан кийин 2019-жылы 3 000 кишинин арасында сурамжылоо жүрдү. Андан тышкары, жаш категорияларына жараша өткөрүлгөн изилдөөлөр да бар. Ошолордун баарын анализдеп көрсөк насвай колдонгондордун саны көбөйүп жатканы байкалды. Алсак, аялдар арасында насвай колдонгондордун саны жети эсеге (2005-жылы 0,5 пайыз жеткен эмес), эркектер арасында үч эсеге өскөн. Үймө-үй кыдырып сурамжылоодо көп аялдар жооптон качып же тамеки, насвай колдонгонун жашырып коюп жатышты. Статистиканын өсүшүнө, биринчиден, тамекинин кымбатташы себеп болсо, экинчиден насвайдын ээн-эркин сатылып жатканы себеп. Эң коркунучтуусу, тамекиге салыштырмалуу насвайга көз каранды болуп калуу батыраак. Андан кутулуу да оор. Себеби насвайдагы никотин түз эле мээге барып түшөт", — деди Бекбасарова.