Улуттук "Эргүү" театр сыйлыгынын жыйынтыгы чыкты. Жеңүүчүлөрдүн тизмеси
© Фото / пресс-служба Минкультуры КР
Жазылуу
Иш-чараны министрлик, Кыргызстан театр ишмерлер союзу жана "Айтыш" коомдук фонду уюштурган.
БИШКЕК, 14-май — Sputnik. Кыргызстанда улуттук "Эргүү" театр сыйлыгынын жыйынтыгы чыгып, жеңүүчүлөр аныкталды. Бул тууралуу Маданият, маалымат, спорт жана жаштар саясаты министрлиги кабарлады.
Иш-чараны министрлик, Кыргызстан театр ишмерлер союзу жана "Айтыш" коомдук фонду уюштурган.
Эң мыкты дебют — Азимбек Жуманов, Султан Ибраимов атындагы Ош улуттук драма театрынын "Амансыңбы, апаке!" спектаклиндеги Сагындын ролу үчүн;
Эң мыкты музыкалык жасалга — Алмаз Куланбаев, Кыргыз мамлекеттик "Учур" драма театрынын "Жүрөктөгү бороон" спектаклинин музыкалык жасалгасы үчүн;
Эң мыкты сценография — Чынара Чотурова, Барпы атындагы Жалал-Абад облустук драма театрынын "Өмүр кечиндеги өкүт" спектаклинин сценографиясы үчүн;
Балдар үчүн коюлган спектаклдеги мыкты роль — Назира Ишенбаева, Надырбек Шамурзаев атындагы Ош облустук куурчак театрынын актрисасы, "Булбул куштун арманы" спектаклиндеги Эркенин ролу үчүн;
Жаштар ойногон спектаклдеги мыкты роль — Сезим Эшинбек кызы, Ош мамлекеттик университетинин киноакадемиясында коюлган "Өлүп тирилгендер" спектаклиндеги Ушакчынын ролу үчүн;
Эркектин мыкты ролу — Михаил Калюжный, Чыңгыз Айтматов атындагы Орус драма театрынын "Ревизор" спектаклиндеги Хлестаковдун ролу үчүн;
Аялдын мыкты ролу — Ольга Осокина, Чыңгыз Айтматов атындагы Орус драма театрынын "Ревизор" спектаклиндеги Анна Андреевнанын ролу үчүн;
Аялдын экинчи пландагы мыкты ролу — Шайыр Мамбетова, Барпы атындагы Жалал-Абад облустук драма театрынын "Өмүр кечиндеги өкүт" спектаклиндеги Амбранын ролу үчүн;
Эркектин экинчи пландагы мыкты ролу — Дмитрий Балбекин, Чыңгыз Айтматов атындагы Орус драма театрынын "Ревизор" спектаклиндеги Почтмейстердин ролу үчүн;
Эң мыкты улуттук пьеса — Жаныш Кулмамбетов, "Түнкү кат" драмасы (Касымаалы Жантөшев атындагы Ысык-Көл облустук муздрама театрында сахналаштырылган);
Жаштар ойногон эң мыкты спектакль — "Өлүп тирилгендер", Ош мамлекеттик университетинин киноакадемиясынын студенттери сахналаштырган;
Балдар үчүн коюлган эң мыкты спектакль — "Булбул куштун арманы", Надыр Шамурзаев атындагы Ош облустук куурчак театрынын спектакли;
Эң мыкты чет элдик спектакль — Казакстандын Иляс Омаров атындагы Костанай облустук театры койгон "Султандын аты – Султан жолу" спектакли;
Эң мыкты режиссура — Уланмырза Карыпбаев, Барпы атындагы Жалал-Абад облустук драма театрында "Өмүр кечиндеги өкүт" спектаклин койгондугу үчүн;
Эң мыкты спектакль — "Ревизор", Чыңгыз Айтматов атындагы Орус драма театрынын спектакли;
Театр искусствосун ЖМКда эң мыкты чагылдырган журналист — Аида Шекенова, ЭлТРдин редактору, кыргыз театры тууралуу көрсөтүүлөрүнүн топтому үчүн;
КР эл артисти Акылбек Абдыкалыков, Султан Ибраимов атындагы Ош улуттук драма театрынын артисти Солтобай Кулбаев, Чыңгыз Айтматов атындагы Орус драма театрынын грим бөлүмүнүн башчысы Инна Головина театр өнөрүнө кошкон өзгөчө салымы үчүн сыйланышкан.
Апаз Жайнаков атындагы Баткен облустук музыкалык драма театры Кыргыз театр искусствосунун өнүгүшүнө кошкон олуттуу салымы үчүн, Токтоболот Абдумомунов атындагы Кыргыз драма театрынын жарык берүүчүсү Тилек Усупбеков театр искусствосуна кызмат кылганы үчүн Кыргызстан театр ишмерлер союзунун башкармалыгынын атайын байгесине татыды.
