Россия БУУнун Адам укуктары боюнча кеңешинде байкоочу бойдон калды
© AFP / FABRICE COFFRINI
Жазылуу
Байкоочу макамы Москвага кеңешке мүчө мамлекеттердин ыйгарым укуктары менен тете мүмкүнчүлүктөрдү берет.
БИШКЕК, 16-апр. — Sputnik. Россия БУУнун Адам укуктары боюнча кеңешинде иштөө укугунун чектелишине жол берген жок. Бул тууралуу РИА Новостиге ТИМ башчысынын орун басары Сергей Вершинин билдирген.
"Эгерде Россия 7-апрелде "Ливия сценарийине" макул болсо, укуктарыбыз чектелмек. Адам укуктары боюнча кеңештеги мүчөлүгүбүздү улантууга бир жарым жыл калган. Биз бул убакытта унчукпай эле отуруп бермекпиз", — деген дипломат.
Ал Адам укуктары боюнча кеңештин документтеринде ага мүчө болгон мамлекеттердин иши токтотулгандан кийин көрүлчү чаралар тууралуу эч нерсе жазылбаганын белгиледи. Министрдин орун басары 2011-жылы кеңеш Ливиянын мүчөлүгүн токтотуп, бардык укугунан ажыратканын эске салды. Өлкө чечимдерди кабыл алууга, добуш берүүгө, күн тартибиндеги маселелерде сөз сүйлөөгө, билдирүүлөрдү даярдоого жана таратууга катыша албай калган.
Ал эми байкоочу макамы Москвага кеңешке мүчө мамлекеттердин ыйгарым укуктары менен тете мүмкүнчүлүктөрдү берет.
"Биз мурдагыдай демилгелерди көтөрүп, резолюциялардын долбоорлору боюнча сүйлөшүүлөргө катышып, сөз сүйлөп, билдирүүлөрдү жасаганды уланта беребиз. Башкача айтканда, биз оор учурда дагы эл аралык коомчулукка Россиянын актуалдуу маселелер боюнча позициясын жеткире алабыз", — деген Вершинин.
7-апрелде Бириккен Улуттар Уюмунун Башкы ассамблеясы Россиянын БУУнун Адам укуктары боюнча кеңешине катышуусун токтоткон. Резолюцияга 93 мамлекет макулдугун берсе, 24ү каршы чыккан. Ал эми 58 өлкө добуш берүүдөн карманган. Демилгени колдобогон мамлекеттердин арасында Алжир, Беларусь, Боливия, Бурунди, Борбордук Африка Республикасы, Кытай, Конго, Куба, Түндүк Корея, Эритрея, Эфиопия, Габон, Иран, Казакстан, Кыргызстан, Лаос, Мали, Никарагуа, Россия, Сирия, Тажикстан, Өзбекстан, Вьетнам, Зимбабве бар.
