Камчыбеков: Кумтөрдөн кеминде 1,8 млрд. доллар каражат түшөт
"Кумтөрдү улутташтыруу жолу менен кетсек Centerra компаниясына компенсация төлөп калышыбыз ыктымал эле. Анткени улутташтыруу боюнча БУУнун кабыл алган резолюциясы бар. Бүгүнкү күндө Кыргызстан Centerra компаниясына коюлган доонун, алар келтирген аргументтердин негизинде сүйлөшүү аркылуу Кумтөр кайтарылды. Муну жакшы жаңылык катары баалоого болот. Анткени 1997-жылдан бери Кумтөр кенинен 440 тоннадай алтын өндүрүлүп, 12 миллиард доллар түшкөн. Анын ичинен Кыргызстанга 13-14 көрсөткүч менен алсак 1,5 миллиард доллар, ал эми 30 көрсөткүч менен 4,5 миллиард доллар калган. Бул жерде, мисалы, 2020-жылдын жыйынтыгы менен өндүрүлгөн 17,3 тонна алтындан 960 миллион доллар пайда тапса, анын 16 пайызы өлкөдө калып, калганы чет жакка чыгып кетүүдө деген сөз. Ал эми мындан ары кенден канча каражат табылса, ал толугу менен өлкөдө калат. Адистер Кумтөр боюнча долбоорду үчкө бөлүп, ошол багытта сунуштарды берүүдөбүз. Биринчиси, кендин мамлекеттин карамагына өтүшү. Экинчиси, экологиялык көйгөй боюнча коюлган доонун кандай болуп чечилгенин коомчулукка ачык айтуу зарыл. Анткени бул маселе азыр болбосо кийин баары бир көтөрүлөт. Ошондуктан баары ачыкталып, бул маселенин тегерегиндеги талаш-тартыш ырбабай чекит коюлушу шарт. Үчүнчүсү, кенди иштетүү маселеси. Centerra компаниясынын планы боюнча 195 тонна алтын аныкталып, 2031-жылга чейин иштетүү мерчемделип жаткан. Кийин Кумтөргө тышкы башкаруу киргизилгенде ал программаны, чалгындоо иштеринин натыйжаларын алып кетип калышты. Сүйлөшүүлөргө ошол программаны кайтаруу боюнча талапты кошуу зарыл. Анан жабык иштетилеби же ачыкпы, кандай иштетилет деген маселени адистер менен кеңешип, программасын түзүү зарыл. Анткени эсептөөлөр боюнча, аталган кенди дагы тогуз жылдай иштетүүгө болот. Ошол убакытта жылына жок дегенде 200 миллион доллардан тапсак дагы 1,8 миллиард доллардан кем эмес каражат бюджетке түшүп калат", — деди Камчыбеков.
