Абдыкеримов: мыйзамсыз мергенчилик үчүн айыпты көбөйтүү мерчемделүүдө
Жазылуу
Жаратылыш ресурстары, экология жана техникалык көзөмөл министрлигинин жаныбарлар дүйнөсүнүн башчысы Нурлан Абдыкеримов жапайы жаныбарларды коргоого багытталган иштер тууралуу айтып берди.
Жапайы жаныбарларга мыйзамсыз мергенчилик кылгандар үчүн айыпты көбөйтүү мерчемделүүдө. Бул тууралуу Нурлан Абдыкеримов Sputnik Кыргызстан радиосундагы маегинде билдирди.
Абдыкеримов: мыйзамсыз мергенчилик үчүн айыпты көбөйтүү мерчемделүүдө
Анын айтымында, жапайы жаныбарлар байырлаган жерлерди үй жаныбарлар ээлеп бара жатат.
"Жапайы жаныбарларды коргоо жаатында комплекстүү иш-аракеттер көрүлөт. Анын ичинде нормативдик укуктук актыларга өзгөртүү киргизүү каралууда. Тактап айтсак, мыйзамсыз мергенчилик үчүн айыптарды көтөрүү максаты коюлган. Мындан тышкары, жапайы жаныбарлар байырлаган жерлер жылдан-жылга тарып бара жатат. Анткени өлкөдө мал чарбачылыгы өнүгүп, жайыттар тартыш болууда. Мындан улам жапайы жаныбарлар байырлаган жерлерди үй жаныбарлары ээлеп бара жатат. Ошондуктан жайыттарды бөлүштүрүү жаатында иштерди жөнгө салуу зарыл. Себеби жайыттардагы тоютту үй жаныбарлар түгөтүп, жапайы жаныбарлар эл жашаган аймактарга чейин түшүп келип, анын кесепетинен браконьерлерге жем болууда. Мына ушул сыяктуу көйгөйлөрдүн баарын комплекстүү чечүү каралууда. Өлкөдө Кызыл китепке кирген жаныбарлар акырындап өсүп бара жатат. Мисалы, аркар-кулжанын саны 2018-жылы 12 628, 2019-жылы 14 545, 2020-жылы 16 125, 2021-жылы 17 616 баш болуп, төрт жылда 4988 башка көбөйгөн", — деди Абдыкеримов.
Ошондой эле ал активдүү жарандар көбөйүп, жаратылышка аяр мамиле кылуу зарылдыгын коомго жеткирип жатканы оң таасир бергенин кошумчалады.
