Найзабеков: жайыттарды дыйканчылыкка берүү элге жакпай жатат
Жазылуу
"Кыргыз жайыты" улуттук жайыт пайдалануучулар бирикмесинин консультант-эксперти Байтемир Найзабеков кунарсыз деп бааланган жайыттарды дыйканчылыкка берүү мыйзам долбоору элет тургундарын тынчсыздандырып жатканын айтты.
Асылдуулугун арттыруу максатында төмөнкү жайыттарды дыйканчылык багытында өздөштүрүүгө берүү сунушу элден чыккан жок. 2016-жылы ушул эле сунуш мыйзам долбоору болуп германиялык эл аралык кызматташуу коому тарабынан иштелип чыгып, ЖКга келип түшкөн. Ошол кездеги президенттер А.Атамбаев, кийин С. Жээнбеков тарабынан артка кайтарылган. Эми Жогорку Кеңештин VII чакырылышына кайрадан сунушталып отурат. Бул тууралуу Байтемир Найзабеков Sputnik Кыргызстан радиосунда маек куруп жатып билдирди.
Найзабеков: жайыттарды дыйканчылыкка берүү элге жакпай жатат
Анын айтымында, аталган мыйзам долбоорунун негизги максаттарынын бири жерди асылдандыруу жана жакырчылыкты жоюу деп айтылганы менен, иш жүзүндө бул эки багытта тең эффективдүүлүгү жокко эсе болот.
"Өлкөдө жайыт боюнча мыйзам 2009-жылы кабыл алынды. Ага чейин азыр сунушталып жаткан мыйзам долбоорундай эле ижарага берилип келген. Ошондо да ижарага жайыттарды алгандар менен албагандардын ортосунда чыр-чатак байма-бай жаралып турган. Азыр дагы аталган мыйзам долбоорунда "конкурстук негизде кунарсыз жайыттар ижарага көп жылдарга берилет" деп турат. Бул учурда конкурсту өтө көп акчалуулар утуп алып, гектарлаган жерлерди көп жылдарга ижарага алуу менен, соңунда менчиктешип кетүү коркунучу жаралууда. Бул көрүнүштү биз башыбыздан өткөргөнбүз, андыктан элге азыркы мыйзам долбоору жакпай турат. Экинчи учуру "дыйканчылыкка өздөштүрүүгө көп жылдык мөмө бактарын тигүүгө берилет" деп турат. Эгер биздин максатыбыз аталган жайыттарды багбанчылыкка колдонуу менен жакырчылыктан чыгуу болсо, анда бул куру аракет дейт элем. Биз алма өстүрүп эмес, ошол колдо бар эт, сүт багытын иштетип, өркүндөтүүнү колго алсак болмок", — деди Найзабеков.
Ал малдын туягы көбөйүп жаткан учурда жайыттарды дыйканчылыкка өздөштүрүүгө берүү менен жайыт жетишсиздиги жаралышы мүмкүндүгүн кошумчалады.
