Чокоев: жайыттар ижарага берилсе дыйкан менен малчы кагышат
Жазылуу
Жумгал районунун жайыт пайдалануучулар бирикмесинин төрагасы Кылычбек Чокоев кунарсыз жайыттарды өздөштүрүүгө дыйкандарга берүү мыйзам долбоору жер кыртышын жакшыртууга да, мал чарбачылыгына да пайда алып келбейт деп эсептейт.
"Асылдуулугу азайган жайыттарды дыйканчылык багытында өздөштүрүүгө берүү" мыйзам долбоорунда айылдарга жакын жайгашкан жайыттар тууралуу сөз болууда. Бир сөз менен айтканда, малчылардын жаздоосу болуп эсептелет. Бул тууралуу Кылычбек Чокоев Sputnik Кыргызстан радиосунда маек куруп жатып билдирди.
Чокоев: жайыттар ижарага берилсе дыйкан менен малчы кагышат
Анын айтымында, аталган жайыттарды кунарсыз деп баалоо процедурасы өзү туура эмес жүрүп жатат.
"Учурда Айыл чарба министрлиги 500 миң гектарга жакын жайытты асылдуулугу төмөн деп баалап, дыйканчылык багытта өздөштүрүүгө берүүнү сунуштаган мыйзам долбоорун алып чыкты. Биринчиден, бул жерлерди кунарсыз деп баалоонун өзү туура эмес. Анткени бул жерлер айылдарга жакын жайгашкан ички жайыттар болуп эсептелет. Малчылар малын жайлоого алып чыкканга чейин 1-1,5 ай ушул жерде кармашат. Элде чөптүн жакшысы да, жаманы да шыбак деп айтылат. Көк чыга элек үзүмчүлүк маалда алгач шыбак жерден көтөрүлөт. Мал бул аралыкта, өзгөчө жылкы баласы, кар тээп мына ушул шыбак менен тоюнат. Андан соң гана ортоңку жайыттарга айдап кетишет. Аталган жерлерди дыйканчылык багытта өздөштүрүүгө 20 жылга берүү каралууда. Мындай учурда ошол дыйкан менен малчынын ортосунда талаш маселелер жаралат. Мал айдап өтүүдө тоскоолдуктар келип чыгат. Мунун арты менен эле ошол жайыттардын жер кыртышынын оңолуп кетишине эч ким кепилдик бере албайт. Мындан сырткары, 20 жылдан кийин ал жерлердин тагдыры эмне болот? Ижарасын узартып отуруп соңунда жеке менчикке өтүп кетпейби?" — деди Чокоев.
Ал үлүшкө тийген жерлерди сугарууда көйгөйлөр жаралып жаткан учурда жайыттарды дыйкандарга ижарага берүү менен ирригациялык маселелер курчуй турганын кошумчалады.
