Мамытов: Улуттук банк санарип сом долбоорун иштеп чыгууда
© Sputnik / Асель Сыдыкова
Жазылуу
Министрлер кабинетине караштуу Экономикалык саясатты изилдөө институтунун эксперти, экономист Улукман Мамытов санарип сом долбоору тууралуу маалымат берди.
Улуттук банк учурда санарип сом долбоорун байкоо, иликтөө, ишке ашыруудагы туш келүүчү тобокелчиликтер боюнча иш алып барууда. Бул тууралуу Улукман Мамытов Sputnik Кыргызстан радиосунда маек куруп жатып билдирди.
Мамытов: Улуттук банк санарип сом долбоорун иштеп чыгууда
Анын айтымында, санарип сомду ишке киргизүү же киргизбөө чечими 2025-жылы кабыл алынат.
"Учурда Улуттук банк санарип сом долбоорун иштеп чыгууда. Атайын түзүлгөн жумушчу топ санарип сомду колдонууга киргизүүдөгү артыкчылыктар жана тобокелчиликтерди аныктап жатат. Мен бул боюнча жумушчу топтун мүчөсүмүн. Алдыда дагы бир жумушчу топ түзүлүп, алар долбоорду ишке ашыруу механизмдерин, тестирлөөдөн өткөрүү, анын коопсуздугу деген сыяктуу маселелерди карайт. Андан соң гана санарип сомду жүгүртүүгө киргизүү же киргизбөө чечими кабыл алынат, бул долбоордун концепциясы боюнча 2025-жылга барат. Улуттук сомдун азыр эки түрү бар, кадимки кагаз акча жана электрондук түрү. Электрондук түрүн биз кагазга айландырып же ошол бойдон деле төлөмдөрдү жүргүзүп, колдонуп келебиз. Санарип акча деле ушул сомго байланат. Тактап айтканда, сомдун куну түшсө түшөт, көтөрүлсө кошо жогорулайт. Санарип сомдун да ар биринин өзүнө тиешелүү коду болот, кагаз же электрондук акчадан айырмасы ар бир сомдун өзүнүн тарыхы жазылат. Биткоин сыяктуу эле санарип сом которулуп жүгүртүүгө чыккан сайын артынан тарыхы сакталып кала берет. Бара-бара бул анын айланышын оорлотуп коюшу мүмкүн. Ошондуктан азыр санарип сомдун тарыхын өзүнчө архивге сактоо жана ал акчаны куйругу жок эле айлантуу маселелери да каралып жатат. Бул эми техникалык жагы", — деди Мамытов.
Экономист санарип сом кирип калса, ага кепилдикти мамлекет берерин кошумчалады.
