Баланы тажатпаган спорт ийримин кантип тандоо керек? Машыктыруучунун кеңеши
© Фото / Pexels / Kampus Production
Жазылуу
Адистин пикиринде, ата-эне алгач баланы спортко кандай максатта аралаштырып жатканын өзүлөрү жакшы түшүнүшү керек.
БИШКЕК, 11-мар. — Sputnik. Баланы тажатпай турган спорт ийримин кантип тандоо керектигин РИА Новости агенттигине педагогика илимдеринин доктору, Россиянын эмгек сиңирген машыктыруучусу Тамара Михайлова айтып берди.
Адистин пикиринде, ата-эне алгач баланы спортко кандай максатта аралаштырып жатканын өздөрү жакшы түшүнүшү керек.
"Баланы спорттук ийримге берүүнүн эки максаты бар. Биричиси — жөн гана сергек жашоо образына, өзүн-өзүн коргоого, ден соолугуна кам көрүүгө үйрөтүү. Экинчи жолу — кесипкөй спортчуну тарбиялоо. Башкача айтканда, келечектеги өлкө, дүйнө же Олимпиада чемпионун даярдоо. Андыктан ата-эне алдына кандай максат койгонун так билиши зарыл", — деди Михайлова.
Андан соң машыктыруучу баланы спортко аралаштыруудагы маанилүү учурларды санап берди:
биринчи кезекте ата-эне өзү үлгү болушу керек. Дивандан түшпөй, смартфонду тиктеген ата эч качан баласын спортко үндөй албайт;
экинчиден, генге көңүл буруу зарыл. Мисалы, чоң ата, чоң эне (же тайлары жагынан), ата-эне, ага-эжелеринин арасында спортко шыктуулар барбы, болсо кайсы жагына, бул өтө маанилүү;
баланын өзү менен сүйлөшүп, эмнени каалап жатканын билүү керек. Ошондой эле анын мүмкүнчүлүгүн эске алуу зарыл. Мисалы, шахматка жан үрөгөн баланы атасынын же апасынын гана каалоосу менен футболчу болосуң деп кыйноо туура эмес.
Ошондой эле Михайлова көп нерсе машыктыруучудан көз каранды экенин айтып, анын ишине так экенин кантип билсе болорун айтты.
"Өз ишин сүйгөн машыктыруучу ата-эне менен тыгыз байланышта болот. Баланын шыгынан тышкары маанайына, эс алуусуна, ичкен-жегенине чейин көңүл бурат", — деди ал.
Сөзүнүн соңунда педагог кандай учур болсо дагы баланы алгач мактап жана шыктандыруу керектигин кошумчалады.
