Өмүрбеков: идиш жууган каражатка кызыл өңгөчү күйгөн балдар көбөйүүдө
© Sputnik / Асель Сыдыкова
Жазылуу
Медицина илимдеринин доктору, Иса Ахунбаев атындагы медициналык академиянын Балдар хирургиясы кафедрасынын башчысы Талант Өмүрбеков балдар кандай себептер менен кайрылып жатканын айтты.
Химиялык каражаттардан күйүк алып кайрылган наристелердин арасында идиш жуугуч затты билбей ичип алып кызыл өңгөчү күйгөн балдар биринчи орунга чыкты. Анын курамы щелочтон тургандыктан күйүктүн эң оор абалына кептейт. Бул тууралуу Талант Өмүрбеков Sputnik Кыргызстан радиосунда маек куруп жатып билдирди.
Өмүрбеков: идиш жууган каражатка кызыл өңгөчү күйгөн балдар көбөйүүдө
Анын айтымында, идиш жуугучтун щелочуна күйгөн кызыл өңгөчтө катуу берч пайда болуп, бала тамак ичүү мүмкүнчүлүгүнөн ажырайт.
"Балдардын химиялык каражаттардан күйүк алуусунда көбүнесе ата-энелердин шалаакылыгы себеп болууда. Наристелер минтип жабыркаган учурлар сап башына чыкты. Кырсыкка кабылган ата-энелердин дээрлик баары эле каражатты башка идишке куюп коюшкан жана балдардын колу жеткен жерде кармап келишкен. Экинчи орунда уксуска күйгөн балдар турат. Алар деле ушул сыяктуу бала ала турган жерге коюлуп калгандыктан билбей ичип алышат. Азыр кеп кичинекей наристелер тууралуу жүрүүдө. Ошондой эле соңку учурда марганцовканын кристаллдарын жеп алып күйүк алган балдар бар. Муну менен катар оюнчуктардын, пульттун же башка заттардын майда батареяларын жутуп алган учурлар көбөйдү. Аны бала жутуп алганда эгер өпкө тарабына кетип калса катуу жөтөл пайда болот. Ал жылып кеткен соң жөтөл токтоп, алгачкы сааттарда эч нерсе болбогондой ойноп жүрө берет. Бирок дал ушул маалда дарыгерлерге тезинен алып баруу керек. Анткени анын ичиндеги зыяндуу заттар кычкылданып, эрип, организмге олуттуу зыян алып келиши ыктымал. Тилекке каршы, кээ бир учурда баланын горшогун аңдып, күтүп убакыт өткөрүп жиберген ата-энелер кездешет. Бала жутуп алган майда заттын кээ бири анын ашказанына түз кетпей калышы мүмкүн", — деди Өмүрбеков.
Хирург балдарга оюнчук сатып берерде ата-энелерди батарея салган жагы оңой ачылгандарын албай эле коюуга чакырды.
