Улуттук банктын валюта рыногундагы абал боюнча брифинги. Урунттуу учурлар
Жазылуу
24-февралда өлкөдө доллар 10 сомго кымбаттап, 95ке чейин жеткен. Андан соң акырындык менен түшө баштаган. Бүгүн эртең менен кайрадан көтөрүлүп, 97 сомго чыкты.
БИШКЕК, 28-фев. — Sputnik. Улуттук банктын расмий өкүлү Аида Карабаева брифинг учурунда валюта рыногундагы абал тууралуу айтып берди.
Белгилей кетсек, 24-февралда өлкөдө доллар 10 сомго кымбаттап, 95ке чейин жеткен. Андан соң акырындык менен түшө баштаган. Бүгүн эртең менен кайрадан көтөрүлүп, 97 сомго чыкты.
Төмөндө Карабаеванын айткандарынын урунттуу учурларын сунуштайбыз:
Улуттук банк тышкы факторлордун ички экономикага терс таасирин тийгизбеши үчүн аракеттерди көрөт. Негизги максат — финансылык стабилдүүлүк жана баанын туруктуулугу;
тышкы факторлор ички валюта рыногундагы курска таасир этип, азыраак туруксуздукка алып келди. Жыл башынан 26-февралга чейин Улуттук банк жалпы суммасы 169 миллион долларлык үч интервенция жасаган;
рынок көбүнесе психологиялык фактордон улам активдешип кетти;
валюта рыногундагы абал салыштырмалуу туруктуу. Мисалы, 24-февраль күнү АКШ акчасынын баасы кескин көтөрүлбөшү үчүн 13 миллион доллар сатыкка чыккан;
Улуттук банктын эл аралык резервдеринин көлөмү жетиштүү жана ал өлкөнүн товарлар жана кызмат көрсөтүүлөр рыногунун келечектеги көлөмүнүн алты айын жабат. Улуттук банктын эл аралык резерви 2 768 миллион долларды түзөт;
финансы системасында запас болгондуктан тышкы факторлорго туруштук бере алат;
Кыргызстандагы коммерциялык банктардын көпчүлүгү Улуттук банк аркылуу же түздөн-түз SWIFT системасына туташтырылгандыктан Россиянын айрым банктарын SWIFT системасынан өчүрүү тобокелдиги жергиликтүү банк кардарларынын төлөмдөрүн токтотууга алып келбейт;
улуттук жана эл аралык төлөм системалары штаттык режимде иштеп жатат;
банк системасы туруктуу иштеп, бардык кызматтарды көрсөтүүдө;
Улуттук банк өлкө ичиндеги жана сырттагы кырдаалга көз салып турат. Ички рыноктогу абалдын туруктуу болушуна зарыл болгон аракеттерди көрүүгө даяр;
интервенция жүргүзүүгө даяр;
жакынкы арада өнөктөш өлкөлөрдүн валюта курстары олку-солку боло бериши мүмкүн. Бул нерсе Кыргызстандагы абалга дагы таасир этпей койбойт;
Улуттук банк "Кыргыз алтындын" алтынын сом менен сатып алат. Валюталар запасынын 20 пайызы алтындан турат;
"Улуттук банктын валюта резевдери кайсы өлкөлөрдүн банктарында сакталып турат?" деген суроого ачык жооп айтылбайт ("Россиянын банктарындабы?" деген суроо берилген — ред.).
инфляция тууралуу — буга чейин Улуттук банк инфляцияны 12 пайыздык деңгээлде кармай турганын айткан;
паникага алдырып, чет элдик валюта сатып алуунун зарылдыгы жок.
