Алхожоев: жарандын ден соолугу тууралуу маалымат бир системага чогултулат
16:00 21.02.2022 (Жаңыртылды: 14:51 24.02.2022)
Жазылуу
Саламаттык сактоо министрлигине караштуу Электрондук саламаттык сактоо борборунун директору Тимур Алхожоев "Санариптик ден соолук профили" маалыматтык системасын ишке ашыруу боюнча жумуштун 70 пайызы аткарылганын айтты.
Система ар кандай маалымат базаларынан жана саламаттык сактоо мекемелеринин маалыматтык тутумдарынан алынган маалыматтарды бириктирген борбордук компонент болуп саналат. Анда адамдын ден соолугу жөнүндө негизги маалыматтар жеткиликтүү болот. Бул тууралуу Тимур Алхожоев Sputnik Кыргызстан радиосунда маек куруп жатып билдирди.
Алхожоев: жарандын ден соолугу тууралуу маалымат бир системага чогултулат
Анын айтымында, системада адамдын негизги маалыматтары, камсыздандырылган статусу, катталган ооруканасы, ооруканага жаткыруу тууралуу, психоневрологиялык же наркологиялык диспансердик каттоодо турган абалы, лабораториялык изилдөөлөрдүн жыйынтыгы боюнча жана эмдөө жөнүндө маалымат жайгаштырылат.
"Коронавирус саламаттык сактоо тармагын кооптуу абалга кептеди. Андыктан министрлик оперативдүү чараларды көрө баштады. Ошентип биз электрондук саламаттык сактоонун максаттуу моделин түздүк. Анын негизинде 2021-жылы тогуз улуттук программа иштеп чыктык. Алсак, вакцина алуу реестри (бир миллиондой электрондук сертификат көчүрүлгөн) жана психоневрологиялык, наркологиялык диспансерлерде каттоого тургандыгы тууралуу маалым катты алуу (160 сом болчу, система Түндүк платформасында жеткиликтүү) автоматташтырылып, жыйынтыгында 15 миллион сом үнөмдөлдү. Биз "Санариптик ден соолук профили" маалыматтык системасын Түндүк системасына интеграцияладык. Эми жарандар бардык маалыматты бир жерден ала алат. "Санариптик ден соолук профилин" иштеп чыгуу "Санарип MED" санариптик саламаттык сактоону өнүктүрүүнүн максаттуу моделин ишке ашыруунун алкагында Электрондук саламаттык сактоо борбору тарабынан ишке ашырылган. Бул инновациялык чечим медициналык кызматтардын жеткиликтүүлүгүн жана сапатын жогорулатууга, ошондой эле бейтапка да, дарыгерине да керектүү маалыматтын жеткиликтүүлүгүн жогорулатууга багытталган. Министрлик ар бир жарандын жеке өзгөчөлүктөрүн эске алуу менен ден соолугуна мониторинг жүргүзүүнү өзүнүн артыкчылыктуу багыты катары аныктайт. Ушул максаттар үчүн министрлик "Санариптик ден соолук профили" санарип продуктуну тесттик режимде ишке киргизди. Бул саламаттык сактоонун улуттук бирдиктүү маалыматтык системасын куруудагы маанилүү кадам, келечекте кагаз медициналык карта колдонуудан баш тартууга шарт түзөт. Ошондой эле ILAB, KIF, KSF жана башка лабораториялык системалар менен өз ара иштешип, кыска убакытта ден соолук тууралуу маалыматты жарандар смартфону, медициналык адис компьютери аркылуу алуусуна жол ачат", — деди Алхожоев.
Ал "Санариптик ден соолук профили" санарип продуктуну ишке ашыруунун кийинки этабында алынган убактылуу эмгекке жарамсыздык баракчалары жөнүндө маалыматы, ар кандай маалым каттар (086, 083, 088), аткарылган функционалдык изилдөөлөр жөнүндө маалымат (УЗИ, ЭКГ, рентген, КТ, МРТ ж.б.), электрондук жеңилдетилген рецепттер тууралуу маалыматтар киргизилерин жана система 2022-жылы этап менен ишке ашырыларын кошумчалады.
