Нурматов: антителону изилдөөгө катышкан 9400 киши экинчи этапка да чакырылды
Жазылуу
Вирус инфекцияларына каршы күрөшүү боюнча илимий-практикалык борбордун жетекчиси, медицина илимдеринин доктору, профессор Зуридин Нурматов коронавируска антителону изилдөөнүн экинчи этабы 21-25-февраль аралыгында өтөрүн айтты.
Былтыр июнь айында коронавирус менен ооруп айыккан адамдарды өз каалоосу менен илимий изилдөөгө катышууга чакырганбыз. Жыйынтыгында 12 000ге жакын адамдан кайрылуу келип түшкөн, бирок 9 400 киши катышкан. Эми ошол 9 400 адамга иликтөөнүн экинчи этабы жүргүзүлөт. Бул тууралуу Зуридин Нурматов Sputnik Кыргызстан радиосунда маек куруп жатып билдирди.
Нурматов: антителону изилдөөгө катышкан 9400 киши экинчи этапка да чакырылды
Анын айтымында, илимий иликтөө Санкт-Петербургдагы Пастер атындагы микробиология жана эпидемиологияны иликтөө илимий институту менен биргеликте жүргүзүлүүдө.
"Аталган илимий изилдөө 21-22-24-25-февраль күндөрү республика боюнча даярдалган 69 медициналык пунктуларда өтөт. 23-февраль өлкөдө майрам күнү болуп эсептелгендиктен бул күнү иликтөөгө келгендер кабыл алынбайт, бирок Бишкектин Логвиненко, 8 дарегинде жайгашкан биздин илимий борбор майрам күнү келгендер үчүн да иштей берет. Катышуучуларга экинчи этапка чакыруу каты электрондук почталарына жөнөтүлгөн. Эгер алар өз почтасы эмес, жергиликтүү медициналык кызматкердин же бала-чакасынын электрондук дареги аркылуу катталышкан болсо, кат жеке өздөрүнө жетпесе деле медициналык жайларга паспортун көтөрүп алып келе беришсе болот. Аларга атайын ID-номер берилген, аны унутуп калган болсо аты-жөнүн айтса биздин кызматкерлер бирдиктүү базадан таап чыгышат. Иликтөө катышуучуларга антителосу бар-жогун акысыз билип алуу, мурда бар болгон болсо азайган-көбөйгөнүн текшерип көрүү мүмкүнчүлүгүн тартуулайт. Ошону менен бирге эле мамлекет үчүн жалпы калктын коронавирус боюнча саламаттыгын аныктап, дарылоодогу кийинки кадамдарыбызды тактоого шарт түзөт. Анализдерди алуу акысыз, катышуучулардан документинен башка эч нерсе талап кылынбайт", — деди Нурматов.
Илимпоз жарандарды атуулдук жоопкерчиликти колго алып активдүү катышып берүүгө чакырды.
