Кырбашева: тышкы инвесторлор жергиликтүүлөргө караганда приоритетте
Жазылуу
Шамал жана күн станциялары ассоциациясынын төрайымы Кундус Кырбашева учурдагы энергетикадагы тартыштык көп жылдан бери топтолгон көйгөйлөрдүн жыйынтыгы экенин белгиледи.
Тышкы инвесторлорго көбүрөөк маани берилип, ички инвесторлор көңүл сыртында калып кетүүдө. Бул тууралуу Кундус Кырбашева Sputnik Кыргызстан радиосунда маек куруп жатып билдирди.
Кырбашева: тышкы инвесторлор жергиликтүүлөргө караганда приоритетте
Анын айтымында, жергиликтүү ишкерлер электр станцияларды салууга аракеттенишүүдө.
"Энергетика тармагындагы кризис көп жылдардан бери топтолгон көйгөйлөрдүн жыйынтыгы. Быйылкы аба ырайы дагы абалды татаалдаштырып жиберди. Климаттык шарт мындан кийин дагы жыл сайын катаалдаша бере турганы белгиленүүдө. Ошондуктан энергетиканы өнүктүрүүдө суу ресурстарын колдонууну баланстоо зарыл. Суудан электр энергиясын өндүрөбүзбү же айыл чарбасына колдонобузбу деген маселе келип чыгат. Өлкө энергетикасынын 95 пайызын суудан алынат. Эгерде дагы суу тартыштыгы жаралса, сугат боюнча көйгөй болбошу абзел. Соңку жылдарда күн, шамалдан электр энергиясын өндүрүү зарылдыгы айтылууда. Маселен Энергетика министрлиги инвесторлорго тийиштүү шарттарды түзүп, укуктук-нормативдик документтерди жөнгө салды. Бирок жер бөлүп берүү жаатында көйгөйлөр жаралууда. Ошол эле Айыл чарба министрлиги ары-бери түртүп келет. Мындан улам Энергетика жана Айыл чарба министрликтери биргеликте иш алып баруусу зарыл. Дагы бир көйгөй — өлкөдөгү тариф маселеси. Өлкөдө бул экономикалык эмес, саясий маселеге айланып калган. Электр энергиясын өндүрүү өзүн канчалык актай турганы көйгөй. Жергиликтүү ишкерлер кичи жана чакан ГЭСтерди, күн, шамал станцияларын курууга аракеттенүүдө. Ошол эле учурда бийлик ички инвесторлорго көңүл бурбай, тышкы инвесторлор приоритетте болуп жатат", — деди Кырбашева.
Ошондой эле ал Жер кодексиндеги көйгөйлөрдү жөнгө салуу зарылдыгын кошумчалады.
