Байдылдаев: 222 миң гектардан ашык жер мамлекеттик фондго карайт
Жазылуу
Айыл чарба министринин орун басары Мурат Байдылдаев 1 миллион 200 миң гектар айдоо жердин 222 миң гектардан ашыгы мамлекеттик фонддогу жер экенин белгиледи.
Ижара мөөнөтү бүткөн гана айдоо жерлер министрликтин карамагына кайтарылып, үрөн жана асыл тукум чарбаларына берилет. Бул тууралуу Мурат Байдылдаев Sputnik Кыргызстан радиосунда маек куруп жатып билдирди.
Байдылдаев: 222 миң гектардан ашык жер мамлекеттик фондго карайт
Анын айтымында, быйыл мамлекеттин карамагындагы 13 миң гектардай жердин ижара мөөнөтү бүтөт.
"Былтыр жылдын башында президенттин жарлыгы чыккан. Анда кооперативдерди, үрөн жана асыл тукум чарбаларды өнүктүрүү максатында айыл чарба жерлердин мамлекеттик фонддогуларынын бир бөлүгүн министрликтин карамагына өткөрүү мүмкүнчүлүгүн кароо сунушталган. Айыл чарба министрлиги атайын токтом иштеп чыгып, министрлер кабинетине киргизген. Ал 2021-жылдын 17-декабрында №309 токтом жарык көрдү. Анда айыл чарба продукциясын бирдиктүү массивде өндүрүү жана сатуу үчүн кооперативдер, үрөн жана асыл тукум чарбаларга мамлекеттик фонддогу жерлердин 75 пайызын бөлүп берүү каралган. Бул үчүн жергиликтүү бийлик органдары менен министрлик ал жерлерди аныктап чыгышы зарыл. Учурда инвентаризация иштери аяктады. Республика боюнча 1 миллион 200 миң гектардан ашык жер болсо, ошонун 222 миң гектардан ашыгы мамлекеттик фондго карайт. Мындан 124 074 гектары сугат жер, ал эми кайрак жерлер 101 583 гектарды түзөт. Инвентаризациянын жыйынтыгы менен көп жерлерге ээлик кылып алгандар аныкталды. Ошондуктан алар реформага каршы турушууда. Токтомду ишке ашыруу үчүн жобо иштелип чыгат. Ал жободо ушул жазда ижарага берилген жерлердин мөөнөтү бүткөндөрү гана кайтарылат. 222 миң гектар жер тууралуу сөз болгон жок бул жерде. Жазында республика боюнча 13 миңдей гектардын ижара мөөнөтү бүтөт. Мисалы, ошол эле Чүйдө жалпы 78 079 гектар айдоо жердин 5 миң 547 гектарынын ижара мөөнөтү жазында бүтөт. Ошол жерлердин 75 пайызы комиссия аркылуу аныкталып, үрөн жана асыл тукум чарбаларына берилет", — деди Байдылдаев.
Ошондой эле ал бул токтом боюнча түшүндүрүү иштери жеткиликсиз болуп, туура эмес чечмеленип калганын кошумчалады.
Эске сала кетсек, 2021-жылдын 17-декабрында 309-токтом кабыл алынган. Ага ылайык, мамлекет ижарага берген жерлерди кайтарып алып, айыл чарба кооперативдерине, үрөнчүлүк жана асыл тукум чарбаларына берүүнү мерчемдөөдө. Учурда бул токтом коомчулукта кызуу талкууланып жатат.
