Баткенге өзгөчө макам берүү: өкмөт инвестиция кайсы айылдарга тартыларын айтты
13:19 03.02.2022 (Жаңыртылды: 13:22 03.02.2022)
© Фото / Зульфия Тургунова
Жазылуу
Арзыбек Кожошев чек арада жайгашкан айылдарга инвестиция тартуу кыйын экенин белгилеген.
БИШКЕК, 3-фев. — Sputnik. Министрлер кабинетинин төрагасынын биринчи орун басары Арзыбек Кожошев "Баткен облусунун статусу жөнүндө" мыйзамдын аткарылышы боюнча кеңешме өткөрдү.
Совещание кабинета министров по реализации Закона Кыргызской Республики "О статусе Баткенской области"
© Пресс-служба правительства / Алишер Алиев
Мыйзамга ылайык, аймакта эмне өзгөрүлүп, кандай жеңилдик каралат:
Баткен облусунун бүткүл аймагында атайын салыктык-инвестициялык режим иштейт;
облустун калкына мамлекеттик жана муниципалдык кызмат көрсөтүүлөр жеңилдетилген жана акысыз (медициналык жана башкалар) негизде көрсөтүлөт;
аймакты өнүктүрүү боюнча атайын кеңеш түзүлөт;
аймакты өнүктүрүүгө республикалык бюджеттен жыл сайын 500 миллион сом өлчөмүндө каражат бөлүнөт.
Арзыбек Кожошев аталган мыйзамдын алкагында министрлер кабинети чек арада жайгашып, жеңилдик берилген 62 конуштун тизмесин бекитүү чечими биринчи этапта кабыл алынганын билдирген. Маалым болгондой, бул тизме азырынча толук эмес.
Министрлер кабинетинин төрагасынын биринчи орун басары Арзыбек Кожошев
© Пресс-служба правительства / Алишер Алиев
"Тизмеге Баткен районунун бардык чек аралаш айылдары кирбейт. Анткени аларды киргизүү үчүн өзгөчө шарттар бар. Бул чечимди кайрадан карап чыгып, экинчи этап менен жеңилдикке муктаж башка айылдарды тизмеге киргизели деп жатабыз. Баткен облусунда социалдык-экономикалык көрсөткүчтөрү бир топ жогору болгон айылдар бар. Аларга жеңилдиктер каралбаганы менен башка экономикалык стимулдаштыруу механизмдери каралат. Негизги максатыбыз — чек арага жакын жайгашкан, мамлекеттин жардамына чындап муктаж болгон айылдарды бекемдөө", — деди Кожошев.
Ал инвестициялык портфелди бөлүштүрүү жана салынган инвестицияларды коргоо боюнча мамлекеттик кепилдиктерге токтолгон.
"Чек ара боюнча чыр болуп жаткан айылдарга инвестиция тартуу өтө кыйын экени жашыруун эмес. Баткен облусунун өзгөчө макамы чек ара тилкелеринде жайгашпаган айылдарга инвестиция жасоо дегенди түшүндүрөт. Алсак, Кадамжай, Кызыл-Кыя шаарларына инвестиция тартылып, 62 айылда салык, жер преференциялары жана башка мамлекеттик колдоо түрлөрү болот", — деген министрлер кабинетинин төрагасынын орун басары.
Кожошев февралдын экинчи жарымында Баткенде өкмөттүн биринчи көчмө жыйыны өтөрүн айтып, мыйзамды ишке ашыруу боюнча ченемдик-укуктук актыларга киргизилген бардык өзгөртүүлөр кеңешмеде кароо үчүн даяр болушу керектигин белгилеген.
