Акымбаева: бала убагында эмдөөдөн өтсө, жугуштуу илдеттерден корголгон болот
12:15 05.01.2022 (Жаңыртылды: 13:03 05.01.2022)
Жазылуу
Республикалык ден соолукту чыңдоо жана массалык коммуникация борборунун адиси Асел Акымбаева улуттук календарь боюнча ооруларга каршы эмдөөнүн түрү жана иммундаштыруу тартиби жөнүндө айтып берди.
Улуттук календарга ылайык, балдар 2, 3,5 жана 5 айга толгон учурларда беш ооруга каршы вакцинаны кайталап алып, ымыркайда жугуштуу ооруларга каршы толук кандуу иммунитет пайда болот. Бул тууралуу Асел Акымбаева Sputnik Кыргызстан радиосунда маек куруп жатып билдирди.
Акымбаева: бала убагында эмдөөдөн өтсө, жугуштуу илдеттерден корголгон болот
Анын айтымында, улуттук календарь боюнча бала өз убагында эмдөөдөн өтүп турса жугуштуу илдеттерден корголгон болот, эгер ооруп калса да жеңил өтөт.
"Улуттук календарь Саламаттык сактоо министрлиги тарабынан бекитилген. Дарыгерлер эмдөөнү ошонун негизинде жүргүзөт. Календарга ылайык, балдар 11 жугуштуу ооруга каршы эмдөө алат. Бул оорулар адамга аба аркылуу жуккандыктан, вакцина албаган адамдарда илдет жугузуп алуу коркунучу бар. Жаңы төрөлгөн ымыркайдын жашоосунун биринчи эле мүнөтүндө ар кандай вирус оору чакырышы мүмкүн. Ал эми вакциналар баланын иммундук системасын күчөтүп, башкарууга мүмкүн болгон жугуштуу ооруларды алдын алууга, каршылык көрсөтүүгө же жеңип чыгууга жардам берет. Ошон үчүн биз ымыркайды төрөт үйүнөн баштап кургак учук, вирустук гепатиттин В түрүнө каршы эмдейбиз. Андан кийинки эмдөө иштери бала эки айында көк жөтөл, кептөөр, тырышма, гепатиттин В түрүнө жана гемофилдик инфекциянын В түрүнө, шал оорусуна жана пневмококк жугуштуу ооруларына каршы эмделет. 3,5 айга толгондо эки айында алган вакциналар кайра берилет, башкача айтканда, беш жугуштуу ооруга каршы эмделет. Бала беш айга толгондо эки айында алган вакциналарды үчүнчү жолу кайталап алат. Наристе бир жашка чыкканда биринчи ирет кызамык, кызылча, сенек оорусуна каршы вакцина алат. Ал эми пневмококко үчүнчү жолу эмделет. Календарь боюнча кийинки вакцинация бала эки жашка чыкканда жүргүзүлөт. Анда наристе көк жөтөл, кептөөр, тырышма ооруларына каршы эмделет. Алты жашында кептөөр, тырышма, кызылча, кызамык жана тепкиге каршы жасалат. 11 жашында кептөөр жана тырышмага каршы вакцина алат", — деди Акымбаева.
Дарыгер 16 жаштан баштап адамдар ар 10 жыл сайын кептөөр жана тырышмага каршы (26, 36, 46, 56) вакцина алып турушу керектигин кошумчалады.
Подкасттын толук вариантын төмөнкү видеодон көрүңүз:
