Өкмөт айыл жана мал чарбасы боюнча токтом кабыл алды. Аткарыла турган иштер
20:00 27.12.2021 (Жаңыртылды: 20:01 27.12.2021)
Жазылуу
Документ агроөнөр жай комплексинин экспорттук потенциалын жогорулатуу, агрардык сектордун тармактарына дем берүү максатында кабыл алынганы айтылды.
БИШКЕК, 27-дек. — Sputnik. Айыл чарба кооперативдерин, үрөнчүлүк жана асыл тукум мал чарбаларын өнүктүрүү максатында атайын токтом кабыл алынды. Бул тууралуу өкмөт билдирди.
Тийиштүү документке министрлер кабинетинин төрагасы Акылбек Жапаров кол койгон.
"Аталган чечим айыл чарбасын, тамак-аш жана кайра иштетүү өнөр жайын, айыл чарба продукциясын, чийки зат жана азык-түлүк рыногун өнүктүрүү, агроөнөр жай комплексинин экспорттук потенциалын жогорулатуу, агрардык сектордун тармактарына дем берүү максатында кабыл алынган", — деп айтылат маалыматта.
Документке ылайык, жергиликтүү мамлекеттик администрацияларга Айыл чарба министрлиги менен биргеликте төмөнкү иштерди аткаруу тапшырылды:
айыл чарба продукциясын айыл чарба кооперативдеринин, үрөнчүлүк жана асыл тукум мал чарбаларынын бирдиктүү массивде өндүрүүсү жана сатуусу үчүн Айыл чарба жерлеринин мамлекеттик фондунун пайдаланууга рентабелдүү жерлеринин 75 пайызын тактоо жана аныктоо боюнча тийиштүү жумушчу комиссия түзүү;
жүргүзүлгөн изилдөөнүн натыйжасы боюнча Айыл чарба жерлеринин мамлекеттик фондунун пайдаланууга рентабелдүү жерлеринин 75 пайызын белгиленген тартипте Айыл чарба министрлигине мөөнөтсүз (мөөнөтүн көрсөтпөстөн) пайдаланууга берүү;
Айыл чарба министрлиги көрсөтүлгөн жерлерди белгиленген тартипте мөөнөтсүз пайдаланууга кабыл алуусу жана жерлердин максаттуу багыты боюнча пайдаланылышын көзөмөлдөөгө тийиш.
Жергиликтүү өз алдынча башкаруу органдарына көрсөтүлгөн иш-чаралар аяктагандан кийин Айыл чарба жерлеринин мамлекеттик фондунун жерлерин белгиленген тартипте ижарага берүү сунушталды.
