Жумаканова: Кыргызстандагы COVID-19дун штаммдарын өзүбүз изилдеп жатабыз
© Sputnik / Асель Сыдыкова
Жазылуу
Санитардык-эпидемиологиялык департаменттин Сыноочу лабораториялык борборунун жетекчиси Айгүл Жумаканова Роспотребнадзор менен түзүлгөн келишимдин алкагында Кыргызстандын эки референс-лабораториясында COVID-19 геномун секвенирлөө жүргүзүүгө мүмкүнчүлүк түзүлгөнүн айтты.
Пандемиянын башында COVID-19дун А варианты тараган болсо, эки жыл ичинде вирустун өзгөрүү жөндөмдүүлүгүнөн улам В вариантындагы мутацияланган жаңы штаммдар ("индиялык", "түштүк африкалык", "британиялык", "омикрон" ж.б.) пайда болду. Биздин республиканын аймагында кайсы штаммдар жүрүп жатканын аныктоо үчүн биоматериалдар РФтин "Вектор" вирусология жана биотехнология мамлекеттик илимий борборуна жөнөтүлчү. Бүгүнкү күндө Роспотребнадзор менен түзүлгөн келишимдин алкагында өлкөдөгү COVID-19дун штаммдарын өзүбүз изилдөөгө мүмкүнчүлүк түзүлдү. Бул тууралуу Айгүл Жумаканова Sputnik Кыргызстан радиосунда маек куруп жатып билдирди.
Жумаканова: Кыргызстандагы COVID-19дун штаммдарын өзүбүз изилдеп жатабыз
Анын айтымында, ДССУ кыргызстандык адистерди коронавирустун штаммдарын секвенирлөө боюнча окутуулардан өткөрүп берген.
"2021-жылдын башында Саламаттык сактоо министрлигинин буйругу менен жумушчу топ түзүп, коронавирустун жаңы штаммдарын секвенирлөө боюнча иштерди баштаганбыз. Жаңы штаммдарды аныктоого кандай жабдыктар, реагенттер, ыкмалар жана кандай билим керектиги боюнча маалыматтарды чогултуп, иш планын түздүк. Кыргызстанда болгону эки секвинатор (жабдык ар кайсы вирустун геномун толук чечмелеп бере алат) бар. Анын бирөө иштебейт, ал эми экинчиси Кургак учук улуттук борборунун референс-лабораториясынын базасында жайгашкан. Санитардык-эпидемиологиялык департамент башка мамлекеттен келген, стационарда катуу ооруп жаткан, вирустук концентрациясы жогору болгон ар кандай жаш курактагы бейтаптардын мазокторун алып, биоматериалдарын топтоду. Алгачкы изилдөөнү үстүбүздөгү жылдын май айында чет мамлекеттен келген адистердин катышуусунда жүргүзүп, алар анализдин туура аткарылып жатканын текшерип, тастыктап беришти. Анда 100дөн ашык үлгү текшерилип, анын ичинде А вариантындагы 1-2 жана В линиясындагы ондон ашык штаммдар аныкталды. Биздин натыйжалар "Вектор" лабораториясынын жыйынтыгына жакындап, чукул болуп жатат. Ошондой эле ноябрь-декабрь айларында да 90 үлгүгө анализ жасадык. Бүгүнкү күндө биздин жыйынтык боюнча Кыргызстандын аймагында 97 пайыз ("Вектор" лабораториясынын секвенирлөөсү боюнча 94,2 пайыз) мутацияланган Индиянын "дельта" штаммы жүрүп жатат. Ал эми жаңы "омикрон" штаммы аныкталган жок", — деди Жумаканова.
Ал жаңы штаммдарды аныктоо үчүн реагенттердин запасы февраль айына чейин жетерин, кийинки секвенирлөө жыл башында да жүргүзүлөрүн кошумчалады.
