Кушубакова: үч уулумдун ооруп калганы бизнес ачууга түрткү болгон
13:51 05.12.2021 (Жаңыртылды: 14:27 14.12.2021)
© Sputnik / Асель Сыдыкова
Жазылуу
Экопродукция өндүргөн компаниянын негиздөөчүсү Самара Кушубакова кесиби боюнча экономист болгону менен балалуу болгондон кийин өз багыты боюнча иштей албаганын айтты.
Үч балам витаминдин жетишсиздигинен улам сыздоок чыгып ооруп калышты. Педиатрлар жашылча-жемиш жегиле деп кеңеш беришти. Тамактануу рационун өзгөртүү жөнүндө олуттуу ойлондум. Бир жолу интернеттен үй шартында как жасоочу аппарат жөнүндө окуп калдым. Жолдошумду жабдык алууга көндүрдүм. Ошол учурда 35 миң сом каражатыбыз бар эле, ага кошумча айылдагы малды сатып жабдык алдык. Бул тууралуу Самара Кушубакова Sputnik Кыргызстан радиосунун эфиринде маек куруп жатып билдирди.
Кушубакова: үч уулумдун ооруп калганы бизнес ачууга түрткү болгон
Анын айтымында, учурда ишканада алты адам иштеп, 20дан ашык түрдөгү как өндүрөт.
"Алгач какты сабиз, кызылча жана ашкабактан жасадым. Уулдарыма жакты. Алар дүкөндө сатылган таттуулар жөнүндө ойлонбой калышты. Дал ушул балдарым бизнести ачууга түрткү болушту десем болот. Ишканамды 2020-жылы жаз айында, пандемиянын биринчи толкуну күчөгөн маалда негиздегем. Продукциянын өзгөчөлүгү анын курамында бир грамм да кант же тамак-аш кошулмалары жок. Линияда 20дан ашык жашылча-жемиштер бар. Алгач азыкты тууган, досторго таратып, алардын артынан буйрутмалар келе баштады. Ошентип социалдык тармактарда баракча ачып, сүрөттөрүн жарыяладым. Башында Сокулуктан бери кичүү баламды ээрчитип алып кардарларга кактарды өзүм жеткирип жүрдүм. Бир жолу балам экөөбүз катуу жамгырга калып калдык. Суу болуп үйгө келсем эки балам ачка, ыйлап отурушат. Мындайда баарын таштап салгың келет экен. Бирок ийгиликке жетүү үчүн кыйынчылыктарга чыдаш керек. Биз өндүргөн продукцияны "Кыргызстандын даамы" деп атадык. Анткени сырьёлор өлкөнүн ар кайсы аймактарынан алып келинет. Мисалы, карагат Ысык-Көлдөн, малина жана кулпунай Чүй, алма Баткенден, чычырканак Нарындан, ал эми кара өрүктү Жалал-Абаддан алабыз. Келечекте ар бир азыкка чыккан жерине жараша, мисалы, "Нарындын чычырканагы" деген өңдүү аталыш берели деп турабыз", — деди Кушубакова.
Ал учурда пайдалуу кактар Бишкек, Ош шаарларындагы дүкөн, дарыканаларга коюлуп, продукция ЕАК белгиси менен маркировкалангандан кийин Россия, Түркия, Япония, Түштүк Корея, Улуу Британия, Германия жана Эстониядан буйрутмалар түшүп жатканын кошумчалады.
