Дүйнөдө рактан каза болгон адамдардын 25%ы тамекинин азабын тартат
08:30 25.10.2021 (Жаңыртылды: 14:27 14.12.2021)
© AFP / MANAN VATSYAYANA
Жазылуу
Тамеки чеккен адамдардын өмүрүндө өпкө рагына чалдыгуу ыктымалдыгы чекпегендерге салыштырмалуу 22 эсеге жогору болот.
БИШКЕК, 25-окт. — Sputnik. Саламаттык сактоо министрлиги тамеки чегүүнүн ден соолукка зыяндуулугу тууралуу айтып, кайсы ооруларды чакырарын тизмектеди.
Адегенде эле чылымдын терең дем алууга тоскоолдук кылары белгиленет.
- Тамеки тарткан адамдын ар бир бешинчисинде, айрыкча бала чагынан же өспүрүм кезинен тарта чегип баштаган адамдарда өпкөнүн өнөкөт обструктивдүү оорусу жаралат. Анткени тамекинин түтүнү өпкөнүн өсүшүн жана өнүгүшүн кыйла жайлатып коет;
- Дүйнө жүзүндө рактан каза болгон адамдардын 25 пайызынын ооруга чалдыгышына чылым себеп болгон;
- Тамеки чеккен адамдардын өмүрүндө өпкө рагына чалдыгуу ыктымалдыгы чекпегендерге салыштырмалуу 22 эсеге жогору болуп саналат. Чылым чегүү дүйнө жүзүндөгү өпкө рагына чалдыккандардын жана каза болгондордун үчтөн экисинен көбүнүн негизги себепчиси болуп саналат;
- Тамеки чегүү активдүүлүктү чектөө менен астма оорусун күчөтүп, аларды майыптыкка кептеп, токтоосуз жардам көрсөтүлүшүн талап кылган астма илдетинин курч кармоо тобокелдигин жогорулатат;
- Тамеки чегүү кургак учуктун латенттик формадан активдүү түргө өтүп кетүү тобокелдигин эки эседен ашуун жогорулатат жана илдеттин табигый жүрүшүн начарлатат. Дүйнө калкынын болжол менен төрттөн бири кургак учуктун латенттик формасынан жапа чегип келишет.
