Пенсионер, окуучулар үчүн жол кире канча болот? Расмий жооп

© Sputnik / Табылды КадырбековБишкектин тургундары аялдамада. Архив
Бишкектин тургундары аялдамада. Архив - Sputnik Кыргызстан, 1920, 30.09.2021
Жазылуу
Бишкек шаарында мектеп окуучулары үчүн коомдук транспорттогу акы арзандабайт. Аларга эч кандай жеңилдик да каралган эмес.

БИШКЕК, 30-сен. — Sputnik. Бишкек шаардык кеңешинин маалымат катчысы Мээрим Керимканова Sputnik Кыргызстан агенттигине пенсионер, окуучулар 1-ноябрдан тарта коомдук транспортко канча сомдон төлөп каларын түшүндүрдү.

Эске салсак, 1-ноябрдан тарта Бишкектеги коомдук транспорттордо жол кире кымбаттайт. Маршруткаларда баа 15 сом болсо, шаар тургундары автобус, троллейбустарга 11 сомдон төлөп калышат.

Мээрим Керимканова пенсионерлер үчүн маршруткаларда мурдагыдай 50 пайыз жеңилдик каралганын белгиледи.

"Эртең менен саат 8:00дөн кечки 21:00гө чейин маршруткалар пенсионерлерден 8 сом алат. Ал эми троллейбус, автобустарда шаардык пенсиялык күбөлүгү барлар акысыз жүрө алышат. Эгер андай күбөлүк болбосо, башка жүргүнчүлөр сыяктуу 11 сомдон төлөшөт", — деди Керимканова.

Ал эми окуучулар үчүн эч кандай жеңилдик каралган эмес. Маалымат катчы мурда да алар үчүн жеңилдик болбогонун белгилеп, мектеп окуучулары катардагылардай эле 15 сом төлөп жүрөрүн кошумчалады. Болгону жети жашка чейинки бөбөктөрдөн жол кире алынбайт. Эгер ата-эне коомдук транспортко эки баласы менен түшсө, бирөө үчүн бир адамдын акысын төлөй турганы белгиленди.

Жаңылыктар түрмөгү
0