БИШКЕК, 30-сен. — Sputnik. Былтыркы жылы Кыргызстанда микрокредит алгандардын саны 3,2 пайызга өсүп, жалпысынан жарандарга 31,1 миллиард сом берилди. Бул тууралуу Улуттук статистика комитети билдирди.
"2020-жылда чакан кредит берүүчү уюмдар тарабынан дээрлик 707 миң адамга 31,1 миллиард сом берилген. Бул 2019-жылга салыштырмалуу 13,2 пайызга, каражаттын көлөмү 3,2 пайызга көбөйдү дегенди билдирет", — деп айтылат маалыматта.
Кайсы аймакта канча киши кредит алды:
- Ош облусу — 177 832;
- Жалал-Абад облусу — 128 563;
- Бишкек шаары — 77 770;
- Чүй облусу — 75 187;
- Баткен облусу — 74 856;
- Ысык-Көл облусу — 70 492;
- Нарын облусу — 49 302;
- Ош шаары — 26 920;
- Талас облусу — 25 688.
Эң көп сумманы Бишкек, Ош шаарларынын жана Чүй облусунун тургундары алат. Мисалы, бишкектиктер орто эсеп менен 62,4 миң сомдон алса, чүйлүктөргө 55,6 миңден туура келет. Ал эми Ош шаарынын тургундарына 48,2 миң сомдон насыя берилген.
Ал эми кайсы багыттарга жумшалганына токтолсок, биринчи орунда 33,6 пайыз менен айыл чарбадагы ишмердикти өнүктүрүү турат. Экинчи орунга керектөөчүлүк (28,2 пайыз), үчүнчүгө соода жана коомдук тамак-аш чөйрөсү (10,4 пайыз) чыкты.
