БИШКЕК, 23-сен. — Sputnik. Коронавирус менен ооругандан кийин жана вакцина сайдырган соң канча убакытта кан тапшырса болорун Республикалык кан борборунун медициналык иштери боюнча директорунун орун басары Айганыш Сатыбалдиева брифинг учурунда айтып берди.
Анын билдиргенине караганда, коронавирустук инфекциянын жеңил түрү менен ооруп айыккандар 30 күндөн кийин кайрадан кан тапшыра алышат. Ал эми вирустун орто жана оор формасы менен ооругандарга кан жана анын компоненттерин тапшырууга алты айга чейин тыюу салынат.
"Эмдөөдөн кийин качан кан тапшырса болору буйрукта бекитилген эмес. Бирок бизге белгилүү болгондой, кан бергенден кийин анын клеткалык элементтери — эритроциттер, лейкоциттер жана тромбоциттер калыбына келиши керек, бул төрт жумадан алты жумага чейин созулат. Ошондуктан эмдөөдөн бир айдан ашык убакыт өткөндөн кийин кан тапшырсаңыз болот", — деди Сатыбалдиева.
Ал медициналык жайлар дагы деле донорлорго муктаж экенин айтып, коронавирустан толук айыгып, вакцина алгандарды кан тапшырууга чакырды.
