БИШКЕК, 13-сен. — Sputnik. Билим берүү жана илим министринин орун басары Надира Жусупбекова кыргызстандык окуучулар кандай тартипте окуурун айтты.
"Эпидемиологдор мектепте балдардын бет кап тагынуусу керек деген сунуштамасын айтышты. Азыр абал туруктуу, бирок башыбыздан пандемияны кечирип жатабыз. Андыктан эмне болорун билбейбиз (кырдаал кандай өнүгөрүн — ред.). Бет капты толугу менен алып салуу да кооптуу болуп турат. Тазалыкты сактайбыз, улам жууп-тазалап турабыз, класстарды желдеткенге аракет кылабыз. Башкысы — ата-энелерге баланын абалы начарласа дароо дарыгерге кайрылуу боюнча түшүндүрүү иштерин жүргүзүү керек", — деди ал.
Бишкектин вице-мэри Виктория Мозгачева шаар бийлиги билим берүүнүн кабинеттик системасын уюштурууга аракет кылып жаткандыгын айтып берди. Мында балдар класстан класска көчпөйт, предметтик мугалимдер өздөрү келип сабак өтөт. Ал Бишкекте бет кап тагынуу милдеттүү түрдө болорун белгиледи.
Буга чейин Мектепке чейинки, мектептеги жана мектептен тышкаркы билим берүү башкармалыгынын алдыңкы адиси Айнура Кусеинова Кыргызстанда окуучулар коронавирус пандемиясынан улам сабакта бет кап тагынып отурууга милдеттендирилбей тургандыгын билдирген эле.
