БИШКЕК, 10-сен. — Sputnik. Жаңы окуу жылында балдар мектепте милдеттүү түрдө бет кап тагынып жүрүшү керек. Бул тууралуу Бишкектин вице-мэри Виктория Мозгачева шаардык кеңештин туруктуу комиссиясынын жыйынында айтты.
Бишкек шаардык кеңешинин депутаты Элнура Дүйшекеева шаардагы мектептерде коронавирусту алдын алуу үчүн кандай аракеттер көрүлөрүнө кызыкты.
"Ар бир мектептин босогосунда дезинфекциялоочу каражатка чыланган бут сүргүчтөр коюлган. Кабинеттерде санитайзерлер бар, балдар бет кап тагынышат. Ал эми мугалимдер эмдөөдөн өткөрүлүүдө. Бир гана маселе — мектепте балдар көп болгондуктан алардын аралыкты сактоосун камсыздоо кыйын болот", — деди Мозгачева.
Sputnik агенттигинин кабарчысы аны менен байланышканда, эпидемиологдордун алгоритмине ылайык, окуучулар бет кап тагынышы керектигин билдирди.
"Албетте, бет кап тагынып жүрүү ыңгайсыз. Бирок вирус кайрадан жайылып кетсе, буга ким жооп берет? Биз бул тууралдуу мектептерге талап койдук. Чынын айтканда, балдар бет кап кийип жүрөрүнө көзүм жетпейт. Бирок биз аларга бет кап тагынбай койсоңор болот деп койсок, дал ошол уруксат берген адам вирус жайылган учурда жооп берип калат", — деди ал.
Буга чейин Мектепке чейинки, мектептеги жана мектептен тышкаркы билим берүү башкармалыгынын алдыңкы адиси Айнура Кусеинова мектепте маска тагынып жүрүү сунушталганы менен милдеттүү эреже катары эсептелбей турганын айткан.
