Бала эмизип жаткан эненин тамактануусу абдан жакшы болушу керек. Таттуу, майлуу, кычкыл жана зыяндуу тамак-аштан баш тартканы оң. Бул тууралуу Аида Идрисова Sputnik Кыргызстан радиосунун эфиринде маек куруп жатып билдирди.
Идирисова: баланы телефон "чукулап" эмизүү биздин энелердин чоң кемчилиги
Анын айтымында, эгер бала эмизип жаткан эне жетиштүү тамак жебесе деле анын организминдеги керектүү заттарды камтып сүт бөлүнүп чыгат. Бирок мындай учурда эненин ден соолугу начарлайт.
"Эненин сүтү баланын ашказанына ыңгайлуу, жакшы сиңире ала турган, коопсуз азык болуп эсептелет. Ымыркай төрөлгөндө эки сааттын ичинде апасынын уузун эмип калышы керек. Бул 100 пайыз баштапкы оорулардын алдын алат. Анткени анын каймагында балага керектүү бүт витаминдер бар. Анын үстүнө ымыркай дароо эмсе, сүт да жакшы чыгып баштайт. Жаңы төрөлгөн бөбөктү эки саат эненин үстүнө жаткыруу да сүттүн көп чыгышына өбөлгө болот. Эмчек сүтү арткы жана алдыңкы болуп бөлүнөт. Алдыңкысы лектролиттерге, сууга бай келет. Ал эми арткысында майлар көп болгондуктан тоюмдуу болот. Ошондуктан баланы толук эмизүү зарыл. Андан тышкары, эмизүүгө шашпай 30-40 минута бөлгөн оң. Бөбөк улам эс алып эмгени туура. Бул жаатта биздин энелердин чоң кемчилиги бар. Эмизердин алдында колду жууп, телефонун ары таштап, анан балага мээримин төгүп эмизсе, сүт да көбүрөөк чыгат. Анан ар бир аял өзүнө жана балага ыңгайлуу боло тургандай отурушу керек. Бул дагы ымыркай менен апасынын ортосунда эмоционалдык, психологиялык байланыштын түзүлүшүн шарттайт", – деди Идрисова.
Дарыгер изилдөөлөр боюнча наристени телефон тиктеп же сүйлөшүп жатып эмизсе, кийин баланын эс тутуму начар калыптанып, башталгыч класста сабакка концентрациясы төмөн болорун кошумчалады.
Подкасттын толук вариантын төмөнкү видеодон көрүңүз:
