Мамлекет башчы Садыр Жапаров телефон аркылуу улуттук курама команданын мүчөсү, грек-рим күрөшү боюнча балбан Акжол Махмудовду Олимпиада оюндарында күмүш медаль жеңип алгандыгы менен куттуктады. Бул тууралуу президенттин маалымат кызматы кабарлап, видеосун жарыялаган.
"Көптөн берки талбаган эмгегиңдин жана талантыңдын натыйжасындагы ийгиликтүү жетишкендигиң менен чын жүрөктөн куттуктайм. Али жашсың, келечекте алтын медалды дагы багындырасың. Сен бүгүн Манастын чыныгы тукуму экениңди далилдедиң. Олимпиадада күмүш медаль баарынын бактысына эле жазыла бербейт. Мындай жетишкендик улуттук спорттун тарыхында көп деле болгон эмес. Ошондуктан бул ийгилик жалпы кыргызстандыктар үчүн өтө маанилүү жана өтө баалуу. Миллиондогон мекендештерибиз демин ичине катып, сенин күрөшүңдү көрүп турушту. Чын жүрөктөн сүрөп, кабатырланып жатышты. Силерди мекенде чыдамсыздык менен күтүп жатабыз. Аман-эсен кайтып келип алышыңарды каалайм", — деген мамлекет башчы.
Жапаров Кыргызстандын олимпиадалык курама командасына мындан ары да ийгиликтерди каалап, калган спортчулар дагы сөзсүз жогорку сыйлыктарга ээ болоруна ишеним артып жаткандыгын кошумчалаган.
Белгилей кетсек, Акжол Махмудов бүгүн, 3-августта, Токиодогу Олимпиадада күмүш медаль тагынды. Ал болгону 22 жашта.
