БИШКЕК, 23-июл. — Sputnik. Жол кыймылы коопсуздугун камсыздоо башкы башкармалыгынын кызматкерлери үч смен менен иштешет. Мындай тапшырманы ички иштер министри Улан Ниязбеков берди.
Эске салсак, бүгүн, 23-июль күнү, президент жайкы туристтик сезондо мас айдоочуларды аныктоо чараларын күчөтүүнү тапшырган. Мындан улам Ниязбеков ыкчам жыйын курганын министрликтин маалымат кызматынан билдиришти.
Министр ИИМдин ЖКККББсы менен Чүй облустук ЖККБнын ишин катуу сынга алып, адамдардын өмүрүнө кайдыгер мамиле жасаган кызматкерлерди иштен гана бошотпостон аларга карата кылмыш ишин дагы козгоо керектигин белгилеген.
"Бүгүндөн тарта үч смен менен иштейсиңер. Жол участкаларын бөлүп, ар бирин жеке бир кызматкерге бекиткиле. Кире бериш менен чыга бериште жана ар бир айылдын борборунда кызматкерлер жол кыймылы коопсуздугун көзөмөлдөшү керек. ИИМдин ЖКККББсы толук курамда жолго чыгышы кажет", — деди Ниязбеков.
"Туристтерге сылык мамиле жасоону жана сапаттуу кызмат көрсөтүүнү талап кылам. Бирок алардын арасында мас айдоочулар болсо мыйзамдын алкагында чара көрүлүшү керек", — деди министр.
Ниязбеков чукул арада жол кыймылы коопсуздугу боюнча мыйзамга өзгөртүүлөрдү киргизип, эреже бузгандарга катаал чараларды көрүү керектигин айтты.
"Эгер кыска убакыт аралыгында коопсуздук жаатында өзгөрүүлөр болбосо, тийиштүү чара көрүүгө туура келет. Силердин ишмердүүлүгүңөр каралат. Иштей албагандар кетиш керек", — деди ал.
Министр жол коопсуздугун пропагандалоо боюнча бир катар тапшырмаларды берип, бул анын акыркы эскертүүсү экенин кошумчалады.
Ал эми 22-июлда Бишкек — Нарын — Торугарт жолунда Honda Stepwagon менен Mitsubishi Pajero кагышып, алты адам каза тапкан. Mitsubishi Pajero унаасынын айдоочусу дагы мас болгон.
