Акылбеков: 2022-жылга чейин Бишкекке 1000 автобус алып келүү пландалган
13:14 28.06.2021 (Жаңыртылды: 14:27 14.12.2021)
Жазылуу
Бишкек шаарынын вице-мэри Русланбек Акылбеков муниципалитет борбор калаада коомдук транспорт көйгөйүн чечүү жолдорун ишке ашыруу аракетин көрүп жатканын белгиледи.
Өзбекстандан 2022-жылга чейин жалпысынан 1000 автобусту алып келүү мерчемделген. Алардын ичинен октябрга чейин 350 автобус келе турганы пландалса, жыл этегинде 500 автобус келип калышы керек. Калган 500 автобусту эмдиги жылы алып келүү каралган. Бул тууралуу Русланбек Акылбеков Sputnik Кыргызстан радиосунда маек куруп жатып билдирди.
Акылбеков: 2022-жылга чейин Бишкекке 1000 автобус алып келүү пландалган
Анын айтымында, долбоор "Эко-пассажирские перевозки" компаниясы менен биргеликте аутсорсинг жолу менен ишке ашырылууда.
"Жакында маршруткалар иш таштап, Бишкекте коомдук транспорт боюнча көйгөй жаралды. Учурунда шаар бийлиги тарабынан тийиштүү аракеттер көрүлдү. Борбор калаанын транспорт көйгөйүн чечүү, автобустарды алып келүү үчүн көптөгөн чет элдик компаниялар менен сүйлөшүүлөр жүрүп келген. Садыр Жапаровдун Өзбекстанга болгон иш сапарында бул маселени чечүү үчүн ишкерлер ортосунда меморандумга кол коюлган. Ага ылайык, октябрга чейин газ менен жүрүүчү 350 автобус келиши керек. Бул шаардагы транспорттук кризиске чейин макулдашылган. Бирок коомдук транспорт көйгөйүнөн улам шашылыш 50 автобусту алып келүү суранычы менен кайрылдык. Ошондуктан дизель менен жүргөн алгачкы автобустар келип, шаардыктарды ташып жатат. Бирок кийин компания бул автобустарды линиядан алып, газ менен жүрүүчү автобустарга алмаштырат. Белгилей кетүүчү жагдай, автобустарды алып келүү үчүн мэрия каражат короткон жок. Болгону муниципалитет линия берет. Калган чыгымдардын баарын компания өзүнө алат. Мындан тышкары, азыр келген автобустар жети метрлик болсо, кийинки партияларда 10-12 метрликтер алып келинет. Алар мүмкүнчүлүгү чектелген жарандарга ыңгайлуу болот. Негизинен жалпы 1000 автобустун 500ү быйыл, калганын эмдиги жылы алып келиниши мерчемделген. Учурда автобус чыгарган заводдун тапшырыгы көп болуп жатканы белгиленүүдө. Ошондон улам долбоорду ишке ашырган компания автобус чыгарган завод менен сүйлөшүп, так убактысын кошумча маалымдайт", — деди Акылбеков.
Вице-мер учурда беш линияга чыккан 50 автобус 1-июлга чейин жарандарды бекер ташый турганын кошумчалады.
