ИИМдин расмий маалыматында алгач Тажикстан тарап миномёт менен аткылап, анын биринчи снаряды "Головной" башкы суу сактагычтын курулушуна түшкөн деп айтылды. Аны кесепетинен Кыргызстан тараптан 35 адам каза таап, 150гө чукул киши октон, таштан жаракат алып ооруканага түштү. Тажикстандын кыргыз айылдарына аткан куралы кичинекейлердин — 13 жаштагы өспүрүм кыз менен 4 жаштагы баланын да өмүрүн алды. Ак-Сай айыл аймагындагы "Головной" тилкесинде миномёттон атылган октон эле 25тен ашык жергиликтүү тургун көз жумган.
Чачты тик тургузган соңку дагы бир маалымат эл үйүн таштай качкан Максат айылынын 53 жаштагы тургуну Ражапбай Эгембердиевдин сөөгүнүн өрттөлгөн үйүнөн табылышы болду.
Он миңдеген адам эвакуацияланып, жанын арачалап турак жайын таштап кетүүгө аргасыз болду. Баткен менен Лейлек райондорунун чек арага жакын жайгашкан айылдары өрттөнүп, үйлөр, социалдык объектилер бүлгүнгө учурады.
Бул күндөрү Кыргызстан менен Тажикстандын ортосунда облус бийлигинин, ИИМ, УКМК жана президенттин деңгээлиндеги сүйлөшүүлөр жүрдү. 1-майдан тарта эки тараптуу сүйлөшүүлөрдөн кийин абал турукташа баштап, чек ара тилкесине тартылган аскер техникасы, күч түзүмдөрү чыгарылды. Ушу тапта аймакта кырдаал тынчый баштап, кыргызстандыктар качкан айылдарына кайра кайтып келүүдө. Бирок тажик тараптын агрессиясынан кийин катуудан казаны, жумшактан күлү калган журтун көрүп, айласы кетип көзүнө жаш алган мекендештерибиз арбын.
Учурда кыргыз өкмөтү келтирилген материалдык чыгымдарды эсептеп жатат.
