Турганбаева: үйдө отурган аялды бакпаса экономикалык зомбулук болуп саналат
14:14 15.04.2021 (Жаңыртылды: 14:27 14.12.2021)
© Sputnik / Асель Сыдыкова
Жазылуу
Саламаттык сактоо жана социалдык өнүктүрүү министрлигинин үй-бүлөлүк зомбулуктан коргоо жана координациялоо бөлүмүнүн башчысы Айкөл Турганбаева министрликтин алдында 117 ыкчам жардам көрсөтүү call-борбору ачыларын айтты.
Зомбулуктун психологиялык, сексуалдык, денесине залал келтирүү, укугун тебелөө жана экономикалык деген түрлөрү бар. Экономикалык зомбулукка аялдар декреттик өргүүдө отурганда же үй кожойкеси болсо, күйөөсүнүн жеткиликтүү камсыздабай жатканы, ажырашып кетсе алименттен баш тартканы жана башка ушул сыяктуу учурлар кирет. Бул тууралуу Айкөл Турганбаева Sputnik Кыргызстан радиосуна маек куруп жатып билдирди.
Турганбаева: үйдө отурган аялды бакпаса экономикалык зомбулук болуп саналат
Анын айтымында, 2020-жылы өлкө боюнча үй-бүлөлүк зомбулуктун 9 125 учуру катталган. Бул 2019-жылга салыштырмалуу 12 пайызга көп.
"Соңку жылдары үй-бүлөлүк зомбулук күчөп жатат. Мунун негизги себеби элдин ой жүгүртүүсү өзгөрүп, мурда намыс деп жашырып келген окуяларды азыр ачык айтып калышты. Анан дагы кээ бир окуялар интернетке тарап кетип, коомчулука белгилүү болуп калууда. Үй-бүлөлүк зомбулуктун 85 пайыздан ашыгы аялдарга карата жасалат. Калган учурларда жаш балдарга жана үй-бүлө мүчөлөрү тарабынан улгайган адамдарга көрүлгөн мыйзам бузуулар бар. Тилекке каршы, ата, апалар муну уят көрүп, тиешелүү кызматтарга арыз менен кайрылуудан көп учурда баш тартып коюшат. Мыйзам боюнча, зомбулука кабылган адам өзү эле эмес, ага күбө болгон киши да тиешелүү органдарга кайрылса болот. Мисалы, милициянын 102 номерине же Өзгөчө кырдаалдар министрлигинин — 112, Акыйкатчы институтунун 115 деген ыкчам номерлери күнү-түнү иштейт, чалуу акысыз. Балдар үчүн атайын 111 номери кызмат кылат. Ошондой эле жакында биздин министрлик тарабынан 117 кыска номери да ишке киргени турат", — деди Турганбаева.
Адис мурда каттоодо турбаган, үлгүлүү үй-бүлө катары эсептелген жубайлар ортосунда да зомбулук болуп жатканы тынчсыздандырарын кошумчалады.
