Нурматов: кыргызстандыктардын 30,8 пайызынан антитело табылган
13:56 24.03.2021 (Жаңыртылды: 14:27 14.12.2021)
Жазылуу
Вирустарды көзөмөлдөө боюнча республикалык илимий-практикалык борбордун жетекчиси Зуридин Нурматов өлкөдө коронавируска чалдыккандардын 64 пайызы ооруну белгиси жок өткөрсө, 22 пайызы гана ооруканага кайрылганын айтты.
2020-жылдын июнь айынын акырынан тарта августтун башына чейин республиканын жети облусу жана эки шаарындагы тургундарга иликтөө жүргүзүлгөн. Ага ылайык, калктын 30,8 пайызынан антитело табылган. Демек, ушунча адам COVID-19 менен ооруп, айыккан. Бул тууралуу Зуридин Нурматов Sputnik Кыргызстан радиосуна маек куруп жатып билдирди.
Нурматов: кыргызстандыктардын 30,8 пайызынан антитело табылган
Анын айтымында, былтыркы иликтөөлөргө ылайык, Нарын элинин 63 пайызы аталган вирус менен ооруп айыкканы белгилүү болсо, Баткенде бул көрсөткүч болгону 13 пайызды түзгөн.
"Былтыркы изилдөөлөргө таянсак, кыргызстандыктардын 30,8 пайызы гана коронавируска чалдыккан. Анткени эки айдан ашык изилдөөбүздүн жыйынтыгында ушунча адамдан гана антитело табылды. Мисалы, борбор калаада 500 миң адамдын антителосу бар экени аныкталды, бирок бул ушул эле учурда Бишкек тургундарынын жарымы коронавирус менен бет келише элек дегенди билдирет. Демек, былтыркы июль айындагыдай массалык түрдө COVID-19 менен ооруган учурлар эми болбойт деп ойлобош керек. Кыргызстандыктардын жарымынан көбүндө али антитело жок. Ал эми качан, кайсыл аймак кызыл зонага айланып кетерин азыр айта албайбыз. Илимий жактан 100 миң киши жашаган аймакта жети күндүн ичинде 80ден ашык вируска чалдыккан адам катталса ал "кызыл", 40тан аз болсо "жашыл", ал эми ортосундагы сандарда илдетке чалдыккандар болсо "сары зона" деп бөлүнөт. Учурда биз калктын антителосун изилдөөнүн экинчи этабын жүргүзүп жатабыз. Буюрса, апрель айынын экинчи жарымында жыйынтыкты коомчулукка жарыялайбыз деп ойлойм", — деди Нурматов.
Окумуштуу вирустун таралышы адамдардын активдүүлүгүнөн гана көз каранды экендигин кошумчалады.
Подкасттын толук версиясын аудиодон угуңуз.
