Жыл этектеп калганда күрөш түрлөрү боюнча улуттук курама команда Сербияда өткөн Дүйнө кубогуна катышып, кыздардан Айсулуу Тыныбекова, Мээрим Жуманазарова чемпион болсо, Айпери Медет кызы коло медаль алды. Бул үч кыздын аркасынан башка спортчу кыздардын өсүп келе жатканы белгилүү.
Жаңы жылды утурлай балбандар майрамдык кечеге, жолугушууларга барып жатышат. Sputnik алардын көз күйдүргөн сүрөттөрүн топтоп, жараткан ийгиликтерин эске салмакчы.
Айсулуу Тыныбекова
Дүйнө элине таанымал Айсулуу Тыныбекованын байге куржунунда Олимпиада оюндарынын гана медалы жок. Ал быйыл 16-декабрда Сербиядагы Дүйнө кубогунда чемпион болду.
Ал эми былтыр Нур-Султан шаарында өткөн дүйнө чемпионатында да алтын медаль тагынган. Бул урунттуу окуя экенин белгилей кетели. Анткени Кыргызстандын тарыхында күрөш боюнча чоңдор арасындагы дүйнө биринчилигинде бир да балбан мындай ийгиликке жеткен эмес.
Тыныбекова, мындан тышкары, бир нече жолу Азия чемпиону болгон жана Азия оюндарында биринчи орунду алган. Эл аралык мелдештерде алган медалдары дагы көп.
Айсулуу Тыныбекова 1992-жылы Жалал-Абад облусунун Майлуу-Суу шаарында төрөлгөн. Нарын облусунун Кочкор районундагы Теңдик айылында чоңойгон.
Килемде 62 килограмм салмактагылар арасында күч сынашат.
Мээрим Жуманазарова
Жылдыздуу балбан кыз Сербияда өткөн дүйнө кубогунда намыска жарап, биринчи орунду камсыздады.
Ал 2017-2018-2019-жылдары жаштар арасындагы Азия чемпионатын жеңген. 2018-2019-жылдары чоңдор арасындагы Азия чемпионатынын эки жолку коло байге ээси болгон.
2017-жылы жаштар арасындагы дүйнө чемпионатында коло, 2019-жылкы жаштар арасындагы дүйнө чемпионатында күмүш медаль алган.
2017-2018-жылдары чоңдор арасындагы Азия оюндарында эки ирет үчүнчү орунду алган. Мындан тышкары, бир катар эл аралык турнирлердин жеңүүчүсү болгон.
Жуманазарова 1999-жылы 9-ноябрда Талас облусуна караштуу Бакай-Ата районунун Оро айылында туулган. Килемдеги салмагы 68 килограмм.
Айпери Медет кызы
Бул балбан кызыбыз да Сербияда өткөн Дүйнө кубогунда курама команданын байге капчыгын толуктап, коло байгенин ээси болду.
2017-жылы жабык имараттагы Азия оюндарында жана Ислам тилектештик оюндарында коло медаль алган. Ошол эле жылы жаштар арасындагы дүйнө чемпионатында алтын медаль тагынган. Бул тарыхый окуя эле. Себеби Кыргызстанда балбан кыздардын эч кимиси жаштар арасындагы дүйнө биринчилигинен жеңүүчү болгон эмес.
2018-жылы Азия чемпиону болгон жана Азия оюндарында коло медаль алган. 2019-жылы 23 жашка чейинки спортчулар арасындагы дүйнө чемпионатында коло байгенин ээси болгон. Быйыл Азия биринчилигинде күмүш тагынды.
Айпери Медет кызы 1999-жылы 30-мартта Талас облусундагы Бакай-Ата районунун Оро айылында туулган. Килемдеги салмагы 76 килограмм.
Нураида Анаркулова
Эл оозуна алынып келе жаткан балбан кыздардын бири Нураида Анаркулова дагы бир катар ийгиликке жеткен.
Ал 2017-жылы Азия чемпионатында вице-чемпион болгон. 2019-жылы 23 жашка чейинки спортчулар арасындагы Азия чемпионатында күмүш медаль, жаштар арасында Азия чемпионатында дагы күмүш байге, ошол эле жылы жаштар арасындагы дүйнө чемпионатында коло медаль тагынган. Россияда өткөн ачык кубокто алтын медаль тагынган.
Анаркулова 2000-жылы 21-апрелде Талас облусундагы Кара-Буура районунун Чоң Кара-Буура айылында туулган. Килемдеги салмагы 57 килограмм.
Назира Марсбек кызы
Келечектүү балбандардын бири Назира да бир катар ийгиликтерди багындырып келе жатат.
Ал 2016-жылы юниорлор арасындагы дүйнө чемпионатында үчүнчү орунду камсыздаган. 2017-жылы жаштар арасындагы Азия чемпионатында коло медаль, Түркмөнстандагы жабык имараттагы Азия оюндарында түркмөн күрөшү боюнча коло байге алган.
Былтыр жаштар арасындагы Азия чемпионатында күмүш медаль тагынса, Түркиядагы эл аралык турнирде биринчи орунга ээ болгон.
Марсбек кызы 1999-жылы Нарын облусунун Ат-Башы районуна караштуу Талды-Суу айылында төрөлгөн. Килемде 59 килограмм салмактагылар арасында күч сынашат.
Калмира Билимбек кызы
Балбан кыз былтыр чоң ийгилик жаратып, жылдызы жанды. Анда ал Болгарияда өспүрүмдөр арасындагы дүйнө чемпионатынын финалында күрөшүп, күмүш медаль алган экинчи кыргызстандык кыз болуп калды. Буга чейин Айпери Медет кызы ушундай жыйынтык көрсөткөнү маалым.
Балбан кыз өзү туулган Нарын облусунун Ак-Талаа районундагы Баетов айылында жашап, Тайлак баатыр атындагы балдар жана өспүрүмдөр спорт мектебинде машыгат. Ал эркин күрөш боюнча облустук чемпионатты беш жолу, республикалык чемпионатты үч ирет уткан.
Посмотреть эту публикацию в Instagram
Ошондой эле Украина, Түркия, Казакстанда өткөн эл аралык мелдештердин жеңүүчүсү. Азия жана дүйнө чемпионаттарында бешинчи орунга татыган. Калмира 17 жашта.
