БИШКЕК, 28-дек. — Sputnik. Президенттин милдетин аткаруучу Талант Мамытов натыйжалуу электрондук кызмат көрсөтүүлөрдү кечеңдетип жаткан мамлекеттик орган жетекчилерин сынга алды. Бул тууралуу өлкө башчынын маалымат кызматынан билдиришти.
Бүгүн, 28-декабрда, "КРдеги санариптештирүүнүн негизги багыттары: келечеги жана чакырыктар" аттуу конференция болуп, ага мамлекеттик органдардын жетекчилери, жарандык сектор менен бизнес-түзүмдөрдүн өкүлдөрү катышты.
"Бүткүл дүйнө заманбап технологияларды киргизип жатса, биздин маморгандар дале эскиче, кагаз менен иштөөдө. Айрым жетекчилер тактамаларды жана маалыматтарды берүү менен өз чөнтөгүнө иштеп жатышат. Бул системаны сындыруу абдан оор, бирок буга биздин эркибиз жетет. Башкы максат — эски системаны жок кылуу, коррупцияны түп-тамырынан бери жоюу, адам факторун четтетүү. Кол койгон жарлыкта мөөнөттөр көрсөтүлгөн. Март айына чейин жетекчилер санариптештирүүнү ыкчам жана натыйжалуу кылып киргизет же алар менен сөзүбүз кыска болот", — деди президенттин милдетин аткаруучу.
Ал мамлекеттик кызмат көрсөтүүлөрдүн 56 түрү бар экенин, анда адамдын туулганынан тартып каза болгонуна чейинки кызмат көрсөтүүлөр камтылганын кошумчалады.
Мамытов белгилегендей, электрондук кызмат көрсөтүүлөр бардык жарандардын жашоосун кыйла жеңилдетет. Ал жетекчилерден электрондук кызмат көрсөтүүлөрдү киргизүүгө көңүл бурууну дагы бир жолу талап кылды.
