Абжапаров 1995-жылы чыгарылган Volkswagen Vento үлгүсүндөгү автоунаасын 2 900 долларга (150 миң сомго) ишеним кат менен саткан. Муну менен ал документтеги ээси бойдон калган. Машинанын айып пулдары көбөйгөндөн кийин иш сотко чейин жеткен. Жакында эле ага сот аткаруучулардан 11 000 сомдук айып пулду 10 күндө төлөбөсө үйү камакка алынарын эскерткен билдирүү келген.
Абжапаров автоунаанын азыркы ээсин табуу үчүн укук коргоо органдарына кайрылып, бирок бир жылдан бери майнап чыкпаганын айтат.
"Бишкектин Ленин райондук милициясына барып "машинамды уурдап кетти" деген негиз менен арыз жазайын десем, кылмыштын курамы жок деп кабыл албай коюшту. Биринчи айып кагаздары келгенде Жол кыймылы коопсуздугун камсыздоо башкармалыгына барып арыз жазгам. Карайбыз деген бойдон дайын жок. Алар атайын издебейт деле экен", — деди Абжапаров.
"Бул машина 19 жолу 5500 сомдук, 88 жолу 3000 сомдук жана 122 жолу 1000 сомдук айып пул салынган эреже бузган. Көбүнчө Балыкчы, Кемин, Токмок жактардагы камерага көп түшкөн. Ал эми Бишкектен "Кудайберген" базарына бараткан жолдо бир нече ирет эреже бузган. Мен деле алты жылдан бери автоунаа айдап жүрөм, эки жолу эле айып кагазы келди. Кандай адамдар 230 жолу эреже бузат таң калам", — деп кайрылды Абжапаров.
Ошондой эле ал аталган автоунааны көргөндөр болсо кабарлап коюуну өтүндү.
