Джеембаев: келечекте айдоочулук күбөлүктү смартфонго көчүрүп алса болот
Айдоочулук күбөлүктү смартфонго көчүрүп алса боло турган долбоор сынамык иретинде борбор калаада иштеп баштайт. Бул тууралуу Тилек Джеембаев Sputnik Кыргызстан радиосуна маек берип жатып билдирди.
Анын айтымында, аталган долбоор "Аймактарды өнүктүрүү жана өлкөнү санариптештирүү" жылынын алкагында ишке ашырылып, казынадан эч кандай чыгым болбойт.
"2021-жылдын башынан аягына чейин айдоочуларга жеңилдиктерди берген атайын долбоор сынамык иретинде борбор калаада иштейт. Адатта унаа ээлери айдоочулук күбөлүгүн же транспорт каражатын каттоо күбөлүгүн (техпаспорт) үйгө унутуп калган учурлар болот. Бул жол коопсуздугун камсыздаган кызматтар менен кездешкенде түшүнбөстүк жаратуусу ыктымал. Мына ошол маселени аталган долбоор чечет деген ойдобуз. Долбоорго ылайык, айдоочулук күбөлүктү смартфонго киргизип алса болот. Ал үчүн атайын тиркемени көчүрүп алуу зарыл. 2017-жылдан кийин алынган айдоочулук күбөлүктөрдүн ээси автоматтык түрдө каттала алат. Ал эми андан мурдагылар калкты тейлөө борборлорго кайрылып смартфонго киргизип алса болот. Аны жол коопсуздугун камсыздаган кызматкерлер өздөрүнүн планшеттери аркылуу текшере алат. Болгону 90-жылдары берилген китепче түрүндөгү айдоочулук күбөлүктөр базага толук кире электигине байланыштуу бул мүмкүнчүлүк берилбейт", — деди Джеембаев.
Ошондой эле ал аталган долбоор жакшы натыйжаларды көрсөтсө, республикага жайылтуу колго алына турганын кошумчалады.
