БИШКЕК, 10-ноя. — Sputnik. 11-ноябрдан тарта Бишкек жана Ош шаарларындагы бардык мектептер окуусун онлайн баштайт. Бул тууралуу Билим берүү жана илим министрлигинин Мектепке чейинки, мектеп жана мектептен сырткаркы билим берүү башкармалыгынын жетекчиси Марат Үсөналиев маалымат жыйын учурунда айтты.
Анын айтымында, эки шаарда эпидемиологиялык абал курч болгондуктан, Республикалык штаб жана Саламаттык сактоо министрлиги реалдуу режимде окууну жандандырууга уруксат берген эмес.
"Бишкек менен Ошто 1-класстар дагы окуусун онлайн режимде улантат. Башкача айтканда, алар мектепке барбайт. Ал эми Чүй облусу боюнча Панфилов районунда азырынча мектептер ачылбайт. Калган райондорунда 1-класстар гана мектепке барып окушат", — деди Үсөналиев.
Министр: китептерде ката кетпеши үчүн "Окуу китеби" борбору ачылды
Белгилей кетсек, мектеп окуучулары 2-ноябрдан 10-ноябрга чейин күзгү каникулга тарашкан. Эртеңден тарта II чейректин сабактары башталат.
