БИШКЕК, 3-ноя. — Sputnik. Дарыгердин көрсөтмөсү жок рентген менен компьютердик томографияга түшө бербегиле. Бул тууралуу Саламаттык сактоо министрлигинин штаттан тышкаркы башкы пульмонологу Талант Сооронбаев маалымат жыйын учурунда билдирди.
Дарыгер оору башталган алгачкы күндөрү баары бир рентген менен компьютердик томография эч нерсе көрсөтпөй турганын белгиледи.
"Коронавирус менен сасык тумоонун белгилери аябай окшош. Аны айырмалай билүү кыйын. Ал тургай мага ооруган бейтап кайрылса, аныкы коронавирус экенин же сасык тумоо экенин аныктай албайм. Ошондуктан сасык тумоонун белгилери байкалган учурда да үйдөн чыкпай, өзүн-өзү изоляцияга алуу керек. Бир нерсе болсо эле рентген, компьютердик томографияга чуркап жатышат. Бирок ал жакка оору жаңы башталганда баруунун кажети жок. Аппараттар бул убакытта эч нерсени аныктап, көрсөтө албайт. Дарыгер айткандан кийин баргыла деп сунуштайт элем. Анын үстүнө кезекке турганда башкаларга оору жугузат же өзүнө жуктурат. Эгер оору жеңил формада өтүп жатса, анда дарыгер менен телефондон сүйлөшүп амбулатордук шартта дарылануу керек. Ооруканадагы бош орундар катуу ооруп жаткан бейтаптарга керек", — деди Сооронбаев.
Өлкөдө 400 кишиден коронавирус табылып, жалпы саны 60 миңден ашты
Пульмонолог үй шартында дарыланып жаткандарга антибиотикти, гормоналдык дарыларды да ашыкча колдонбоону сунуштады. Анын айтымында, антибиотиктерди адатта ооруканада дартты оор көтөрүп жаткандарга гана жазып беришет. Дарыгер анын кесепеттерин айтып, ал тургай өлүмгө алып келиши мүмкүн экенин эскертти.
