БИШКЕК, 2-ноя. — Sputnik. 2-ноябрга караган түнү өлтүрүлгөн россиялык миллиардер Владимир Маруговдун өлүмүнө шектүү катары борбор азиялык жаран кармалды. Бул тууралуу укук коргоо органдарындагы булактарына таянып РИА Новости жазды.
Маалыматка караганда, ишкердин өз үйүндөгү мончодон атып кетишкен. Аялы полицияга маалымат берүүгө жетишип, бирок укук коргоочулар келген кезде Маругов өлүп калган болчу.
“Шектүү катары 1971-жылы туулган борбор азиялык киши кармалды. Жакында сурак бере баштайт”, — деп айтылат маалыматта.
Эске салсак, маркум Владимир Маруговдун уулу Александр бир жыл мурда кыргызстандык таксисттин автоунаасына мотоцикл менен келе жатып урунуп, каза болгон. Көп өтпөй теле алып баруучу Андрей Малахов "Россия 1" телеканалындагы "Прямой эфир" берүүсүндө кыргызстандык таксист менен россиялык миллиардер Александр Маруговдун уулунун мотоцикли кагышкан жол кырсыгын талкуулаган. Эфир учурунда таксисттин ата-энеси жана Кыргызстандын Россиядагы элчилигинин өкүлдөрү маркумдун энесине көңүл айтып, кечирим сурашкан. Бирок берүүгө чакырылгандар менен теле алып баруучу бул жерде баары буюртма аркылуу жасалган деген оюн таңуулашкан.
Мындан улам коомчулукта катуу нааразычылык жаралып, Малахов кыргызстандыктардан кечирим сураган.
