БИШКЕК, 30-сен. — Sputnik. Мурдагы президент Алмазбек Атамбаев Кой-Таш окуясы боюнча сотко катышат. Бул туурасында анын жактоочусу Sputnik агенттигине айтып берди.
Жактоочу соттон Атамбаевдин сот жараянына катышууну камсыздоону сураган.
Судья Марат Сыдыков анын айткандарын канааттандырган. Эми мурдагы президентти 2-октябрда сот процессине алып келишет.
Атамбаев бир жылга чукул мезгил сот менен тергөөнүн аракеттерин тоготпой, сот жараяндарына келбей жүргөн. Анын пикиринде, "экс-президент" макамын мыйзамсыз алышты.
Кой-Таш окуясы
Мурдагы президент Алмазбек Атамбаев 2019-жылы 7-8-августтагы Кой-Таш окуяларынан соң камакка алынган. Жалпысынан Атамбаев сегиз эпизод менен шектелүүдө. Бул окуядан бир киши каза таап, 175 адамдын дарыгерлерге кайрылганы белгилүү болгон.
Атамбаевди кармоо ушул күнү башталган. Былтыркы Кой-Таш окуясын эске салабыз
Атамбаевден тышкары, Кой-Таш окуясы боюнча анын тарапташтары Фарид Ниязов, Равшан Жээнбеков, Мээрбек Мискенбаев, Канат Сагымбаев, Марат Шаменов, Рысбек Карыпбек уулу, Фархат Баабиев, Канат Осмоналиев жана Нооруз Капарбек уулу кармалган.
ЖК депутаттары Асел Кодуранова, Ирина Карамушкина жана Атамбаевдин кеңешчиси Кундуз Жолдубаева үй камагында.
